Áleýmettik jeliler men uıaly baılanys messendjerlerine Jılstroıbek esimi berilgen sábıdiń týý týraly kýáliginiń fotosy taraı bastady,- dep habarlaıdy Qamshy.kz QazAqparatqa silteme jasap.

Ǵalamtor qoldanýshylary ata-analar Turǵyn úı jınaq bankinen baspana alǵannan keıin óz balasyna sondaı esim qoıýǵa sheshim qabyldaǵanyn aıtady. Alaıda banktiń Astanadaǵy bas keńsesi atalǵan aqparatty rastaǵan joq.

Fotodaǵy málimetterge sensek, týý týraly qujat Ońtústik Qazaqstan oblysynyń Shymkent qalasynda berilgen. Jılstroıbektiń tegi - Batyrbek. Ákesiniń aty - Erkebulan.

Biz Turǵyn úı qurylysy jınaq bankiniń Astanadaǵy bas keńsesine habarlasyp, ǵalamtor arqyly taraǵan fotonyń shyn-ótirigin bilgen edik. Bank qyzmetkerleri ol jańalyq týraly estigen. Degenmen, ony rastap otyrǵan joq.

«Bul foto kollaj da bolýy ábden múmkin. Bizdiń bankti jarnamalaýdyń bir ádisi shyǵar. Biraq ol jańalyqty rastaı almaımyz», - deıdi olar.

Áleýmettik jeliler arqyly taralǵan qujattyń túpnusqalyǵy rastalmasa da, ǵalamtor qoldanýshylary bul jańalyqty ájýaǵa aınaldyryp, Turǵyn úı qurylys jınaq banki arqyly baspana alǵan otbasylarǵa balaǵa at qoıýdyń jańa úlgilerin usyna bastady.

«Balanyń aty qazaqsha jazylsa, onyń aty Jılstroıbek emes, Turǵynúıqurylysjınaqbek bolýy kerek qoı», - dep jazdy bireý. «Qyz týsa, Jılstroıgúl dep qoıamyz!», - deıdi taǵy bir qoldanýshy.