Aqtóbedegi jergilikti polısıa basshysy Maqsat Shláshev pen onyń orynbasary Ermek Shoqanovtyń ústinen bas prokýratýranyń tergeý toby qylmystyq is qozǵady, - dep habarlaıdy  Qamshy.kz Azattyqqa silteme jasap.

Bas prokýratýra jergilikti polısıa basshylaryn maýsymnyń basynda bolǵan qarýly shabýyl kezinde «qyzmette áreketsizdik tanytty» dep aıyptap otyr. Bas prokýratýranyń tergeý toby qylmystyq is qaýlysyn 11 qazan kúni qabyldaǵan.

Qaýlyda keltirilgen málimetterge qaraǵanda, besinshi maýsym kúni jergilikti polısıa basshylary «Pallada» qarý satatyn dúkenine qarýlanǵan polısıa qyzmetkerlerin jiberip, odan keıingi qylmystardyń aldyn alý úshin áreket etpegen. «Palladadaǵy» shabýyldan soń ulttyq gvardıanyń 6655 áskerı bólimie ketken «qarýly toptyń jolyn kesip, olardy ustaýǵa nusqaý bermegen». Iaǵnı, kásibı mindetterine nemquraıly qaraǵan.

Osyǵan baılanysty polısıa basshylarynyń ústinen qylmystyq kodekstiń 370-babynyń 4-bólimi («qyzmettegi áreketsizdik») boıynsha is qozǵalǵan.

Bıyl maýsymnyń 5-inde Aqtóbede 26 adam eki qarý-jaraq dúkenine shabýyldap, ulttyq gvardıanyń áskerı bólimin basyp alýǵa tyrysqan. Shabýyl men atystan resmı málimet boıynsha 7 adam qaza taýyp, 40 shaqty adam jaralanǵan. Alty kúnge sozylǵan arnaıy operasıada shabýylǵa kúdikti delingen 18 adamnyń kózi joıylyp, birneshe adam ustalǵan.

Shabýylǵa qatysty 29 adamǵa túrli aıyp taǵylyp, olardyń isi sotqa jetti.