Qazaqstan Respýblıkasynyń Bas prokýratýrasynda ótken alqa otyrysynda elimizdiń Bas prokýrory Jaqyp Asanov «Prokýratýra týraly» Zańnyń 25-2 babyndaǵy quziretin paıdalanyp, úndeý jarıalaıdy, dep habarlaıdy Qamshy.kz.

Turǵyn úı qurylysyna qatysty Qazaqstannyń Bas prokýrory Jaqyp Asanov elge «úı salatyn jeri bar eken ǵoı» dep aqshalaryńyzdy kim bolsa soǵan bermeńizder» degen keńes berdi.

«Turǵyn úı  ómirdegi eń basty qajettiliktiń biri. Halqymyz «Úıi joqtyń kúıi joq» dep beker aıtpaıdy. Ony qol jetimdi etý úshin elimizde arnaıy baǵdarlamalar iske asýda. 25 jylda mıllıonnan astam otbasy baspanaly boldy. Biraq, osy máseleniń basqa da jaǵy bar. Keıbir qurylys kompanıalary arzan baǵamen qyzyqtyryp, kúmándi sharttar usynyp, kóp adamdy aldap ketti. Azamattar jyldap jınaǵan aqshasynan aıyrylyp, armandaǵan páterin ala almaı qalǵan.

3 kún buryn, 10 qazanda jańa zań qoldanysqa endi. Endi qurylys kompanıalary úleskerlerdiń aqshasyn tek eki jaǵdaıda - arnaıy Qor kompanıaǵa kepildik berse nemese ákimdiktiń ruqsat qaǵazy bolsa ǵana tarta alady», - dedi Bas prokýror.

Osy rette Jaqyp Asanov halyqqa ákimdik ruqsatty qandaı jaǵdaıda beriletindigin de tolyq túsindirip berdi.

«Qurylys bitedi dep bank kepildik berse nemese úıdiń qańqasy (karkasy) salynyp bitse. Sóıtip, bul zań alaıaqtardyń qarmaǵyna túsip qalmaýǵa bóget bolmaq. Sondyqtan qazaqstandyqtardy zańǵa súıenip, eskertetinim  kez-kelgen jarnamaǵa, aýyzsha bergen ýádege senip, «úı salatyn jeri bar eken ǵoı» dep aqshalaryńyzdy kim bolsa soǵan bermeńizder! Sózsiz, árkim óz aqshasyna ózi ıe. Biraq, kompanıanyń qujattary zań talaptaryna sáıkes bolmasa da, oǵan aqshasyn berip, aldanyp qalǵandardyń aldynda jergilikti ákimdik te, Kepildik qory da jaýap bermeıdi. Árıne, alaıaqtar qylmystyq jaýapkershilikke tartylar. Biraq, túbinde úıdiń qurylysy aıaǵyna deıin bitpeı, aqshańyz qaıtarylmaı qalýy múmkin», - dedi Asanov.