Din isteri komıtetiniń ókili «Dıapozon» Aqtóbede 5 maýsym kúni bolǵan teraktige qatysqan radıkaldardyń qalaısha teris aǵym jeteginde ketkenin aıtyp berdi, - dep habarlaıdy Qamshy.kz.

Komıtettiń dinı saraptama basqarmasynyń basshysy Balǵabek Myrzaevtyń aıtýynsha, Aqtóbedegi radıkaldar birneshe topqa bólinetin kórinedi. Ol mysal retinde maýsym aıynyń basynda terakt jasaǵan Tańatarov pen Aıtýǵan tobyn keltire otyryp, atalǵan toptar qataryn qalaı tolyqtyratynyn aıtyp bergen.

«Men túzeý mekemesine baryp sóılesken sottalǵan jigitterdiń biri adamdardyń radıkaldarǵa qalaı qosylatynyn aıtyp berdi.  Bul onyń óziniń basynan keshkeni bolýy da múmkin. Bireýdiń kelinshegi aýyryp qalyp, aqsha kerek bolǵan. Qaryz suraǵanda eshkim bere qoımaǵan. Biraq, tanystary arqyly oǵan bireýler habarlasyp 40 myń teńge usynǵan. Keıin ol qaryzdy qalaı qaıtarýdyń jolyn da aıtqan. Ol úshin álgi adamdarmen birge buryn qoldanylǵan qalta telefondaryn arzanǵa satyp alyp, satýmen aınalysý kerek bolady. Tipti, jumysty bastaý úshin bastapqy kapıtal retinde 100 myń teńge aqsha jáne beredi. Osylaısha jumys bastalyp ketedi. Biraz ýaqyttan soń oǵan dinı leksıalar jazylǵan aýdıojazbalar beredi. Sóıtip, ol jigit radıkal toptyń quramyna ótedi. Olar negizinen meshitke kóp barmaıdy, óz páterlerinde jınalyp, ýaǵyz tyńdaıdy. Tańatarov pen Aıtýǵan toby da osyndaı», - degen B. Myrzaev.

Maman radıkaldar qataryn tolyqtyrý úshin qıyn jaǵdaıdaǵy kisilerge kómektesý ádisi paıdalanylǵan. Kelesi ádis – adamdardyń emosıasyna áser etý, olardy «ádiletsizdikterge» qarsy qoıyp, «zardap shekken adamdarǵa» aıashýlylyq týǵyzý.

«Radıkaldar óz múshelerin Sırıada musylmandar jazyqsyz qyrylýda, al, olardyń áıelderiniń ary taptalýda dep aldaıdy. Sosyn baryp eldiń emosıasyna áser etedi. «Musylmandarǵa biz arasha túspesek, kim arasha túsedi? Ana dúnıede sender musylmandardyń betine qalaı qaraısyńdar?» degendeı sózder aıtady. Shet qalǵan adamdar o dúnıede tozaqqa barady dep qorqytady. Osyndaı ýaǵyzdarǵa dinı bilimi joq adamdar ılanady. Olar radıkaldardyń jeteginde ketedi. Olarmen sóıleskende bir kezderi Aqtóbe oblysyna kelip, ýaǵyz júrgizgen reseılik sodyr Saıd Býráskııdiń yqpaly qatty bolǵanyn bildik», - deıdi komıtet ókili.