Salafızmdi ustanýshylar óz ıdeıalary men qundylyqtaryn bizdiń ulttyq mádenıetimizden, rýhanı dástúrlerimizden joǵary qoıady. Sondyqtan da Din isteri jáne azamattyq qoǵam mınıstri Nurlan Ermekbaev Qazaqstan halqy salafızmniń taraýyna zańmen tyıym salmaı-aq, oǵan jol bermeı, zaıyrly qaǵıdattardy basshylyqqa alady degen senimin bildirdi. Bul týraly vedomstvo basshysy Ortalyq komýnıkasıalar qyzmetinde ótken brıfıńte aıtty, - dep habarlaıdy Qamshy.kz Baq.kz – ke silteme jasap.

«Bul tańdaýdy Qazaqstannyń árbir azamaty qoldaýy tıis. Jumyla kótergen júk jeńil bolady. Salafıtterdiń barlyǵy ashyq aıtpasa da qatań dinı qaǵıdalarǵa qurylǵan memleketti qoǵamdyq qurylystyń ıdealdy júıesi dep esepteıdi. Osyǵan baılanysty elimiz úshin salafızmdi múldem jat, teris aǵym dep sanaımyz», - dedi mınıstr.

Qoǵamda salafızmge qarsy ártúrli pikirler aıtylyp jatyr. Qazir mınıstrlik tıisti memlekettik organdarmen birlesip osy máseleni muqıat qarastyrýda. Osyǵan deıin Qazaqstanda 23 lańkestik jáne ekstremıstik uıymǵa, sonyń ishinde salafıttik baǵyttaǵy ekstremıstik uıymǵa tyıym salynǵan.

«Osy rette salafızm uıym emes ekendigin atap ótý kerek. Ol dinı aǵym, kózqarastar júıesi», - dedi Nurlan Ermekbaev.

Onyń aıtýynsha, elimizde qoldanystaǵy zańdar qazirdiń ózinde jasyryn dinı uıymdarmen kúresip, radıkaldy dinı ádebıetterdi taratýdyń jolyn kesýge barlyq múmkindikti jasap otyr.