Qostanaı oblystyq İ.Omarov atyndaǵy qazaq drama teatrynyń  burynǵy dırektory Nurlan Erekeshev nemeresiniń bir jasqa tolýyna oraı teatr qarajaty esebinen toı jasaǵan, - dep habarlaıdy Qamshy.kz «Egemen Qazaqstanǵa» silteme jasap.

Qazir teatrdyń  burynǵy dırektory Nurlan Erekeshevke, bas býhgalter Gúlzada Bektursynovaǵa jáne kasır-býhgalter Meńsulý Kúltaevaǵa qatysty sot isi jalǵasýda. Onda belgili bolǵandaı, burynǵy dırektor, bas býhgalter jáne kasır-býhgalter uıymdasyp, teatrǵa bólingen 163 mıllıon teńgeni talan-tarajyǵa salǵan. Olar aı saıyn bankten alǵan qarjynyń edáýir bóligin bólisip otyrǵan. Onyń 80 paıyzy dırektorǵa, qalǵan 20 paıyzy bas býhgalter men kasır-býhgalterge tıesili bolǵan.

Sotta málim bolǵandaı, burynǵy dırektor 2005 jyldan 2016 jyly teatrdan ketkenge deıin úıine túski tamaqqa barmaǵan. Oǵan teatr qarjysy esebinen kabınetine tústik daıyndalǵan. Úsh bólme úıiniń  komýnaldyq qyzmeti úshin tóleminiń barlyǵy teatr esebinen tólengen. Astanadaǵy nemeresiniń bir jasqa tolý toıyna bir mıllıonnan astam teńge aqsha da teatr esebinen jumsalǵan. Qostanaıdan shaqyrylǵan kisilerdiń poıyzǵa  bıleti de teatr esebinen alynǵan.

Teatr basshylary búdjet qarjysyn talaǵany bylaı tursyn, spektáklderge bılet satýdan  túsetin qarjyny ótirik ósirip kórsetip kelgen.  Teatr tabysynyń jospary «oryndalǵandyqtan» dırektordyń jalaqysyna aıyna 50 paıyzǵa deıin ústeme aqsha qosylǵan. Onyń syrtynda jospardy «oryndaǵan» teatr ujymyna jylyna eki ret syıaqy tólengen. Bul kórsetilgen faktiler  teatr basshysy, bas býhgalteri men kasırine taǵylǵan aıyptyń onnan biri ǵana deýge bolady.