Astanada anasy 20 jyl boıy óldi dep sanalǵan qyzymen qaýyshty. Nebári alty aılyǵynda dúnıege kelgen sábıdiń búginde jer basyp júrgenin onyń otbasy bilmegen, dep habarlaıdy Qamshy.kz Baq.kz saıtyna silteme jasap.

1995 jyldyń aqpanynda 34 jastaǵy Sholpan esimdi áıel altynshy perzentin nebári alty aılyq merziminde dúnıege ákelgen. Týǵanynan múmkindigi shekteýli qyz úsh aı boıy vakýmda ómir súripti. Al úsh aıdan keıin emhana qyzmetkerleri náresteniń baqılyqqa atanǵanyn aıtqan. Tipti, jerleý rásimin de ózderiniń ótkizetinin aıtyp, ata-anany shyǵaryp salǵan. Janargúlden bólek 5 balany tárbıelep otyrǵan ata-ana onyń qaı jerde jáne qalaı jerlengenin de suramaǵan. Abdyrap qalǵan bolsa kerek-ti, jylaǵan kúıi emhanadan shyǵyp kete barǵan.

Bul týraly Habar arnasyndaǵy «Bizdiń úı» baǵdarlamasynda aıtyldy.

«Perzenthanada 20 kúndeı jattym. Odan keıin bizdi sol jerden alyp zertteý ınstıtýtyna alyp bardy. Balamdy alyp qaldy. Men sol jerde júrdim, ol jaqta da vakýmda jatyr edi. Úsh aıǵa deıin kórdim. Dárilerin aparyp júrdim. Jaǵdaıy nashar, aıaǵy býynsyz dep aıtqan bolatyn. Kúnde baryp qaraımyn da ketemin. Úsh aıǵa deıin tiri edi. Bir joly barǵanymda balamdy alyp keteıin dedim, maǵan bermedi. Al kúnderdiń kúninde onyń qaıtys bolǵanyn aıtty», – deıdi Sholpan Dúısenbaıqyzy.

Sholpannyń altynshy perzentiniń búginde aty-jóni týra anasynykimen birdeı. Ol balalar úıinde tárbıelengen. Ata-anasy alǵashqyda oǵan Janargúl dep esim bergenimen, balalar úıine qabyldanǵan kezde qyzmetkerler ony anasynyń aty-jónimen tirkepti. Alaıda kishkentaı ǵana múgedek qyzdy kimniń jáne ne úshin anasynan aıyryp, balalar úıine ótkizgeni búginde belgisiz. Úsh jasqa deıin Ekibastuz balalar úıinde, odan keıin Astanadaǵy psıho-nevrologıalyq dıspanserde bolǵan Janargúl 20 jasynda otbasymen qaýyshyp otyr. Búginde onyń anasy, aǵa-ápkeleri bar. Al ákesi, ókinishke qaraı, ómirden ozyp ketken.

20 jyl buryn bir-birinen aıyrylyp qalǵan ana men balany Mahabbat Manaeva esimdi azamatsha tabystyrǵan.

«Osydan 4-5 jyl buryn Aqmola medısına ýnıversıtetiniń kafedrasynda jumys istedim. Sol kezde birneshe top stýdentterdi basqaryp, eriktilermen birge sol jerge baryp júrdik. Ol jerdegi oıymyz múmkinshiligi shekteýli balalar men stýdentter kóp jumys atqarsyn dedik. Bárinen buryn Sholpannyń jaǵdaıy janymyzǵa batty. Sholpannyń anasy bar ma, joq pa, bilmedik. Bar bolsa, tapsaq degen oıda boldyq. 5 jyl izdedik. Aqparat jınaý óte qıyn boldy», – dedi ol.

Al balalar úıinde tárbıelengen Sholpan anasy men otbasyn tapqanyna qýanyshty. Alǵash kórgende Sholpan Dúısenbaıqyzyn ol birden «mama» dep atapty.