Jalpy ónim jıyntyǵy 1 mln tonnadan astyp otyr. Bul kórsetkish ótken jylmen salystyrǵanda bir jarym esege artyq, dep habarlaıdy Qamshy.kz SHQO baspasóz qyzmetine silteme jasap.

Bıyl Shyǵys Qazaqstan oblysynyń dıqandary jaqsy ónim jınap, joǵary kórsetkishterge ıe boldy. Sharýa qojalyqtary shyǵynǵa batpaı, astyq ónimderin ýaqtyly jınap úlgerdi. Oblystyq aýylsharýashylyǵy basqarmasynda óńirdiń osyndaı rekordtyq kórsetkishterge sońǵy jyldary ıe bolmaǵanyn atap ótti. 

- Zaısan, Shemonaıha, Glýbokoe aýdandarynda astyq jınaý kórsetkishteri belgilengen mejeden asyp túsip, bir gektardan 20 sentner ónim jınaldy. Bul jergilikti sharýa qojalyqtary ozyq tehnologıa tásilderin qoldanǵanyn kórsetip otyr, - dedi SHQO aýylsharýashylyǵy basqarmasynyń basshysy Qonysbaı Tóleýbekov. 

Astyq jınaý naýqanynyń qorytyndysy boıynsha sharýa qojalyqtary ishki suranysty tolyǵymen qamtamasyz etkendigi belgili bolyp otyr. Artyǵy kórshi elderge satylymǵa shyǵarylmaq. Aldyn ala boljam boıynsha bıyl bıdaıdyń bir tonnasy 40 myń teńge shamasynda saýdalanady. Bul sharýalar úshin óte tıimdi baǵa.