QR Premer-Mınıstriniń orynbasary Imanǵalı Tasmaǵambetov EKSPO-2017 kórmesine daıyndyq jáne ony ótkizý máseleleri boıynsha keńes ótkizdi.

Keńes jumysyna Astana qalasynyń ákimi Áset Isekeshev, QR mádenıet jáne sport mınıstri Arystanbek Mýhamedıuly jáne «Astana EKSPO-2017» UK» AQ basqarma tóraǵasynyń birinshi orynbasary Marat Omarov qatysty, - dep habarlaıdy Qamshy.kz primeminister.kz – ke silteme jasap.

Astanada ótetin kórmeniń mańyzdylyǵyn aıta kele, I. Tasmaǵambetov EKSPO-2017 kórmesin uıymdastyrý jáne ótkizý táýelsiz Qazaqstannyń barlyq jetistikterin jáne elordanyń kelbetin pash etýi tıis ekendigin basa aıtty. Osyǵan oraı, sharany ótkizýge jáne qonaqtardy qabyldaýǵa elorda ınfraqurylymynyń daıyndyǵyn qamtamasyz etý, sondaı-aq, kórme qonaqtary jáne qatysýshylarynyń qaýipsizdigi, olardyń qyzyqty ári barynsha jaıly ornalasýy úshin búkil sharalar qabyldanýy qajet.  

«Memleket basshysynyń tapsyrmasyn sapaly oryndaý maqsatynda Mádenıet jáne sport mınıstrligine Astana qalasynyń ákimdigimen jáne «Astana EKSPO-2017» UK» AQ birlesip kórme ótetin kezeńdegi mádenı baǵdarlamany uıymdastyrý máseleleri jónindegi úılesimdi jumysty kúsheıtý qajet. Sonymen qatar, delegattar men qonaqtardyń kelýi boıynsha uıymdastyrýshylyq suraqtardyń oryndalýyn qamtamasyz etý mańyzdy», - dep erekshe atap ótti I. Tasmaǵambetov.

Eske sala keteıik, búgingi tańda QR Mádenıet jáne sport mınıstrligi Astana qalasynyń ákimdigimen, «Astana EKSPO-2017» UK» AQ birlesip arnaıy keshendi baǵdarlama ázirledi. Ol ártúrli janrlyq baǵyttaǵy mádenı is-sharalar ótkizýdi qarastyrady. Atap aıtqanda, qazaqtyń dástúrli ónerin kórsetý, teatrlyq-buqaralyq sharalar, halyqaralyq jobalar, kórmeler, sporttyq jáne aǵartýshylyq-taqyryptyq sharalar.

Vıse-premer atap kórsetkendeı, qalalyq qurylymdar aldynda joǵary deńgeıde qyzmet kórsetý máselesi tur. Uıymdastyrý jumysy aıasynda EKSPO kórmesi nysandarynyń, jalpy Astana qalasyndaǵy kóliktik ınfraqurylymnyń qalypty qyzmeti máselesi baıyppen sheshýdi qajet etedi. Kólik-logıstıkalyq júıeni jetildirý, qoǵamdyq kóliktiń baǵdarlyq jelisin ońtaılandyrý, kólik aǵymyn basqarýdyń jańa júıesin engizý jumysyna erekshe kóńil bólinýi qajet.    

Bul oraıda, keńes barysynda vıse-premer birqatar tapsyrmalar berdi. Astana qalasynyń ákimine jumys shtabymen birlesip elordanyń ınjenerlik-kóliktik ınfraqurylymyn egjeı-tegjeıli zerdeleý tapsyryldy. Dálirek aıtqanda, joldaǵy júktemeni azaıtý maqsatynda kólik aǵymyn modeldeý boıynsha qolaıly nusqalardy esepteý, qonaqtardyń kelý jáne olardyń qaýipsiz ornalasýy boıynsha uıymdastyrýshylyq suraqtardy pysyqtaý, sondaı-aq, mádenı-buqaralyq is-sharalardyń joǵary deńgeıde ótýin qamtamasyz etý.

Osyndaı aýqymdy sharany ótkizý shaǵyn jáne orta bıznestiń damýyna jáne jańa tehnologıalardy meńgerýge aıryqsha serpin beretini anyq. Kórme elordanyń ınfraqurylymy men nysandarynyń qurylysyna jeke ınvestısıa tartýǵa yqpal etedi. EKSPO-2017 uzaq merzimdi áleýmettik-ekonomıkalyq damýǵa oń áser etetin elimizdiń týrısik tartymdylyǵyn kóterýge baǵyttalǵan ımıjdik joba.