Qazaqstan Respýblıkasy aýyl sharýashylyǵy birinshi vıse-mınıstri Qaırat Aıtýǵanov Úkimet otyrysy barysynda aýyl turǵyndaryn jumyspen qamtamasyz etý sharalary men aýyldyq jerlerde kooperasıany damytý týraly málimdedi, - dep habarlaıdy Qamshy.kz Premer-mınıstr saıtyna silteme jasap.

Q. Aıtýǵanov aýyl turǵyndaryn jumyspen qamtý jáne qaıta óńdeý qýattaryn júkteý jeke sharýashylyqtar áleýetin paıdalaný esebinen júzege asyrylatynyn aıtty. QR ASHM oblys ákimdikterimen birlese otyryp jáne QR DSÁDM jyl sońyna deıin naqty mindetter men ındıkatorlardy anyqtaıtyn úshjaqty qadamdyq josparyna qol qoıdy.  Sonymen qatar, is-sharalardy júzege asyratyn jumys toby quryldy jáne óńirlerde túsindirý jumystaryn júrgizý úshin qujattar paketi daıyndaldy.

«28 shilde men 30 tamyz aralyǵynda barlyq oblystarda, sondaı-aq birqatar aýdandarda aýyldyq okrýg ákimderiniń jáne aýdandar ákimderiniń orynbasarlarynyń qatysýymen keńester ótip, is-sharalardyń iske asyrý mehanızmi, kooperatıvter qurýdyń negizi jáne qarjylandyrý sharty jaıly egjeı-tegjeıli túsindirildi», - dep habarlady birinshi vıse-mınıstr.

Q. Aıtýǵanov ákimdikterge bekitken josparǵa sáıkes, aǵymdaǵy jyldyń sońyna deıin 150 aýyl sharýashylyǵy kooperatıvi qurylatyndyǵyn aıtty. Ol 100 sút qabyldaý beketi men 2 200-den astam otbasylyq bordaqylaý alańyn biriktiredi.

«Osy jyldyń 15 qazanyndaǵy jaǵdaı boıynsha 42 sút qabyldaý beketi jáne 3 200 otbasylyq bordaqylaý alańy quryldy», – dedi Q. Aıtýǵanov.

Sondaı-aq, birinshi vıse-mınıstr kooperatıv qurýda formaldy amaldy boldyrmas úshin kooperatıvke jeke sharýa qojalyqtaryn kóbirek tartý úshin onda kem degende 20 qatysýshy bolý mindeti qoıylǵanyn málimdedi.