Uzynaǵash bazarynda mal satyp júrip joǵalyp, sońynan máıitteri tabylǵan úsh jigttiń 36 bas maly aqy ıelerine qaıtarylǵan bolatyn. Al qalǵan 6 bas iri qaradan esh derek joq,- dep habarlaıdy Qamshy.kz Baq.kz –ke silteme jasap.
Aıýandyqpen óltirilgen úsh jigittiń aǵasy Ámirbaıuly Tursynnyń aıtýynsha, qazirshe ustalǵan eki kúdiktiden basqa jańa derekter joq. Biraq, inileri satýǵa aparǵan 42 bas maldyń 36-sy ǵana Jambyl aýdandyq polısıa tarapynan aqy ıelerine qaıtarylǵan. Qalǵan 6 bas maldyń qaıda ekeni áli belgisiz.
«Sol joǵalǵan maldar tabylsa, jańa qylmys deregi ashylýy múmkin. Bul jóninde osy ispen aınalysyp jatqan polıseıler de, tergeýshiler de únsiz. Eki kúdikti turatyn Suranshy batyr aýylyn jáne qylmys bolǵan jerlerdi muqıat tekserse, taǵy da jańa derekter ashylar edi», - deıdi Tursyn Ámirbaıuly.
«Uzynaǵash isi» boıynsha kúdiktiler Talǵat Súleımanov pen Murat Ońalbaevtyń advokaty Almaty oblysynda qaza tapqan aǵaıyndylardyń ólimine qatysty oqıǵanyń mán-jaıyn aıtyp bergen bolatyn.
Advokat Merkebek Mákenbaevtyń aıtýynsha, onyń qorǵalýshylary osyǵan deıin sotty bolmaǵan.
«Olardyń otbasylary bar. Árqaısysynda jeke jer úı men maly bar. Súleımanovtyń úsh uly bar – kenje uly úsh jasta. Ońalbaevtyń da úsh uly bar. Olar Uzynaǵashtan 25 shaqyrym jerdegi aýylda turady», - deıdi advokat.
Sonymen qatar, advokattyń aıtýynsha, qaıtys bolǵan aǵaıyndylar men kúdiktiler tanys bolmaǵan. Kúdiktilerden alynǵan jaýap boıynsha, oqıǵanyń hronologıasy bylaı órbigen:
17 qyrkúıekte Súleımanov Uzynaǵashtaǵy mal bazaryna barady. Ol mal sharýashylyǵymen aınalysady. Senbiden jeksenbige qaraǵan túni bazarda ádette adamdar kópter jınalady: bireý mal ákeledi, ekinshisi oryn alyp qoıady. Osylaısha, kúdiktiler de sol kúni bazarǵa kelip, óziniń 2-3 buzaýyn satady.
Keıinnen Súleımanov eki kólikpen mal ákelgen aǵaıyndylardy kórip, olarmen saýdalasa bastaıdy. Súleımanov 16 bas sıyr satyp alady. Alynǵan taýar úshin kúdikti Súleımanov satýshylarǵa 2 mıllıon teńgeden asa aqsha beredi. Sodan kúdiktiler aǵaıyndylardyń júk kóligimen maldardy Suranshy batyr aýylyna aparady. Jolda Súleımanov óziniń aýyldasy Ońalbaevqa habarlasyp, odan maldardy kólikten shyǵarýǵa kómektesýin suraıdy. 28 qyrkúıekte shamamen saǵat 13.00-de olar Súleımanovtyń úıine kelip, maldardy sonda qaldyrady.
Aıta keteıik, olar aǵaıyndylardyń 36 malyn satyp alamyz dep kelisken eken.
«Sodan Súleımanov olardy aldap, 20 maldy onyń taý jaqta turatyn týysy alǵysy keletinin aıtady. Sonda qalǵan aqshany beremiz dep kelisken. Olar aǵaıyndylarǵa taǵy eki mıllıon 800 myń teńge tóleý kerek bolatyn. Osylaısha, mal satýshylar kelisip, meniń qorǵalýshym ózimen birge vınchester alyp shyǵady. Aǵaıyndardyń «Qarýdy nege alyp shyqtyń?» degen suraǵyna Súleımanov onda qasqyrlar kóp dep, qarýdy qoıshylarǵa aparyp beretinin aıtqan», - dedi Merkebek Mákenbaev.
Taýǵa barýǵa kelisken úsh aǵaıyndy men kúdiktiler osylaısha jolǵa shyǵady. Olardyń sońynan sur tústi Mercedes kóligin júrgizip kele jatqan Ońalbaev keledi. Taýdaǵy qoraǵa jaqyndaǵan boıda olar Sýly saı shatqalynyń aldyna baryp toqtaıdy. Sodan malshylar Kamazdan 12 maldy túsiredi.
«Shatqalǵa jetkende Súleımanov qasyndaǵy er adamnyń arqasyna oq atady. Alaıda ol qulamaıdy. Sodan meniń qorǵalýshym ekinshi ret taǵy oq atady. Sodan er adamnyń máıitin alyp, shóptiń arasyna tyǵyp, ary qaraı kete beredi. Sol jaqta Súleımanov aǵasynyń mal qorasynda qalǵanyn aıtady. Shatqalda Talǵat Súleımanov ekinshi er adamdy atyp óltiredi. Osyny kórgen Murat oǵan «osy qylmys úshin qamaýǵa alynatyndaryn» aıtqan. Al Talǵat bolsa onyń bul aıqaıyna «Eger sen maǵan qazir kómektespeseń, seni de óltiremin» dep jaýap qaıtarǵan», - dedi advokat.
Súleımanov Muratty qorqytyp, oǵan úshinshi er adamdy shaı ishýge shaqyrýyn buıyrady. Sodan Murat úshinshi er adam jaqqa qaraı bet burǵan bolyp, jolda jasyrynyp qalady. Birshama ýaqyt ótken soń Súleımanovtyń ózi sol jaqqa qaraı baryp, tabıǵatty tamashalap júrgen úshinshi er adamdy kóredi.
«300 metr bıiktikte turyp, vıntovkamen úshinshi er adamnyń basyna oq atady. Sodan Muratty taýyp alyp, ony kómektesýge májbúrleıdi. Sóıtip ekeýi máıitterdi Kamazǵa salady. Múrdelerdi Kamazdyń ishindegi tezektermen jaýyp tastaıdy da keri jolǵa shyǵady.
Alaıda júk kóligi jolda buzylyp qalady. Sodan olar Kamazdy sol jaqta tastap, úılerine qaıta beredi. Munyń barlyǵyn Súleımanovtyń ózi aıtyp berdi. Kinásin tolyqtaı moıyndady. Aǵaıyndylardy óltirgen soń qatty qınalǵanyn jáne dúısenbide ózi kelip, kinásin moıyndamaqshy bolǵanyn da aıtty. Sondaı-aq, ol úsh er adamdy 20 maldy tartyp alý úshin óltirgenin aıtty», - dedi advokat.
Sonymen qatar, advokat kúdiktilerdiń bul qylmysty aldyn ala oılastyrmaǵanyn málimdedi.
Al Almaty oblysy prokýratýrasy birinshi basqarmasynyń aǵa prokýrory Álibek Myrzabekovtiń málimdeýinshe, aǵaıyndy úsh jigitti urlanǵan myltyqpen atyp óltirgen.
«Myltyqty ıesi 2 aı buryn joǵaltqan. Qazyrgi tańda Almaty oblysynda qarý-jaraq tonaý faktileri jıilep ketken. 200-den astam qarý-jaraq urlanǵan qarý tiziminde tur. Oblystyq prokýratýra qyzmetkerleriniń aıtýynsha, «Olardyń eshqaısysy tabylmaǵan. Negizinen qarýdy jeke turǵyn úılerden keıde seıfterymen qosa qoldy qylady. Urlanǵan qarý tek qylmys jasalǵanda ǵana áshkerelenip jatady. Qazirgi tańda Almaty oblysy turǵyndarynyń qolynda 24 myń birlik qarý resmı tirkeýde tur», - dedi Álibek Myrzabekov.
Esterińizge salsaq, Taldyqorǵan qalasyna jaqyn mańdaǵy Kóksý aýdanynyń 3 turǵyny Almaty jaqtaǵy Uzynaǵash bazarynda mal satamyz dep iz-túzsiz joǵalyp ketken bolatyn. Keıinirek olardyń óli tabylǵany habarlanǵan edi. Vedomstvodaǵylardyń aıtýynsha, marqumdardyń denesinde zorlyq belgiler bar.
Polıseıler kisi óltirdi degen kúdiktilerdi ustady. Olar Jambyl aýdanynyń eki turǵyny. Qazirgi ýaqytta QR Qylmystyq kodeksiniń 99-baby («Adam óltirý») boıynsha sotaldy tergeý bastalypty. Kúdiktiler ýaqytsha ustaý ızolátoryna qamaldy.
Tergeý aıaqtalǵansha, ustalǵandar eki aıǵa – 24 qarashaǵa deıin qamaýǵa alyndy. Keıinirek Saǵyntaev Almaty oblysynda óltirilgen aǵaıyndylardyń oqıǵasyna qatysty pikir bildirip, sala mınıstrine tıisti tapsyrma berdi. Sondaı-aq,Májiliste de, Senatta da qaza tapqan aǵaıyndylardyń oqıǵasyna qatysty másele kóterildi.
Uzynaǵashta aıýandyqpen óltirilgen úsh jigittiń týystary Elbasydan atý jazasyn engizýdi surap otyr.
