Kesheli beri aqyndar týraly ár túrli áńgime bop jatyr ǵoı. Onda kelgen ekenbiz, qazaqtar. Baıqasańyzdar, aqyndar ólip jatyr, ne isterin bilmegendikten qyzyq qylyqtar kórsetip jatyr, aı astyndaǵy túnge, kún astyndaǵy álemge syımaı júr. Bul jaı emes, tipti tegin emes. Bul áleýmetttik qatynastarǵa qoıylǵan dıagnoz. Zaman ózgerer aldynda, kúrdeli betburystar qarsańynda jurt ıa aqynǵa shúıligip tıisedi ıa aqyndy qorǵan kóredi. Borannyń aldynda ıt qutyrsa, ózgerister aldynda aqynnyń minezi ózgeredi. Mundaı alaǵaı shaqta aqynnyń qulazýy tipti kúsheıedi, dúnıeden baz keshedi, jylańqy bolady, qısyq sóıleıdi, aıqaılaıdy, qoldaryn sermep, ebedeısiz qımyldar jasaıdy, janyna tynyshtyq tappaı alasurady. Sebebi, aqyn qashanda qoǵamnyń barometri bolǵan. Bul ózimdi nemese qalamdas dostarymdy kótermelep, qadirin arttyrý maqsatynda aıtylǵan sózim emes. Bul búgingi ulttyń basyndaǵy jaǵdaıdyń, halyqtyń ishteı tynyp, alaburta alaǵyzyp otyrǵan kúıiniń aqynnyń túısiginde shyńǵyrýy, abdyraǵan eldiń aqynnyń bolmysynda kórinis tabýy dep bilińiz. Osydan keıin aqyn úshin saıasattyń, til men ulttyń bolashaǵy qajet emes dep kórińiz. Budan keıin aqyndar qıalı, olar basqa álemde ushyp júredi, olarǵa báribir dep kórińiz. Aqyn - ár adamnyń ishinde bolyp jatqan sansyz sezimderdi jalǵyz ózi basynan keshiredi. Bári ońaı, bári oıyn bolsa, búgin qannen qapersiz 45-in toılap otyratyn Ámirhanǵa ne kórindi deısizder?! Álde aqyn ólgen soń ǵana áýlıe me? Ólgen adam óleń jazbaıdy, shyraqtar!