21 mamyrdan 25 mamyrǵa deıingi aralyqta Almatyda British Council-diń (Brıtandyq Keńes) uıymdastyrýymen jáne Brıtandyq Kıno ınstıtýtynyń (BFI), Qazaqstandaǵy «Shell» kompanıasynyń, Almaty qalasy ákimdiginiń, Arman kıno-ortalyǵynyń jáne «Eır Astana» kompanıasynyń qoldaý kórsetýimen Hıchkoktyń dybyssyz kıno aptalyǵy ótýde. Aptalyqta BFI muraǵatynan qalpyna keltirilgen jáne brıtandyq kınematografıanyń eń zor jetistikteriniń biri retinde IýNESKO-nyń dúnıejúzilik mura tizimine engen «Hıchkok 9» jobasynyń toǵyz fılminiń altaýy usynylatyn bolady.
Hıchkoktyń dybyssyz kıno aptalyǵy brıtandyq dırıjer Krıstofer Ostınniń jetekshiligindegi «Qazaqstan Kameraty» memlekettik orkestriniń súıemeldeýimen kórsetilgen Pleasure Garden («Lázzat baǵy») fılminen bastaldy. Orkestr osy fılm úshin sazger Denıel Patrık Koennyń arnaıy jazǵan mýzykasyn oryndady. Sondaı-aq, Denıel Patrık Koen Aptalyqtyń ashylýyna qatysty.
«Hıchkok 9» jobasy kemeńger rejıserdiń fılmderimen jumys jasaýǵa bergen múmkindigimen meniń sazger retindegi úlken qyzyǵýshylyǵymdy týdyrdy, osy rette mýzykany jazý kezinde kórkemóner baǵytyn tańdaýda men tolyqtaı erkin boldym. «Lázzat baǵyna» arnap kompozısıa jazǵan kezde, men Stravınskıı jáne Messıannyń týyndylary, Maılz Devıstiń jazy jáne Kýrtıs Meıfıldtiń soýly, Beastie Boys rebi men dı-djeı Shadow sekildi ónerdiń kóptegen bulaqtarynan shabyt aldym. Men osy jumys úshin BFI-ǵa jáne «Hıchkok 9» jobasyn túrli elderde, onyń ishinde Qazaqstanda kórsetýge múmkindik bergeni úshin jeke British Council uıymyna úlken alǵysymdy bildiremin», - dedi ashylý saltanatynda Denıel Patrık Koen.
«Hıchkoktyń dybyssyz kıno aptalyǵy British Council-diń Qazaqstandaǵy 20 jyldyq qyzmetin toılaý jáne Qazaqstan men Ulybrıtanıa arasynda mádenı qatynastardy ornatý sheńberinde ótýde. Óner arqyly elderimizdiń arasynda ózara túsinistikti nyǵaıtý British Council-diń negizgi qyzmet baǵyttarynyń biri bolyp tabylady. Osy jobanyń arqasynda biz Almatynyń turǵyndaryna áıgili brıtandyq rejıserdiń sırek jumystaryn tamashalaý múmkindigin usynyp, sonymen birge osy is-shara úshin mýzykalyq súıememeldeý boıynsha birlesken jumysty júrgizý jáne tájirıbe almasý arqyly Qazaqstan men Ulybrıtanıa mýzykanttarynyń basyn biriktirýge múmkindik aldyq», - dep atap ótti Qazaqstandaǵy British Council dırektory Saımon Ýıláms.
Barlyq fılmder qazaq, aǵylshyn jáne orys tilderindegi sýbtıtrlermen kórsetiledi. «Shampan» fılmi qazaqstandyq dı-djeı Aero-nyń mýzykalyq sýyryp salma áýenimen súıemeldenetin bolady. «Men aralynan shyqqan adam», «Fermerdiń áıeli» jáne «Bopsalaý» fılmderi brıtandyq pıanınoshy Djon Sýınıdiń mýzykalyq súıemeldeýimen kórsetilmek. Fılmderdiń kórsetilimi «Sezar» jáne «Arman» kınoteatrlarynda ótedi.
Sondaı-aq, Hıchkoktyń dybyssyz kıno aptalyǵy sheńberinde Denıel Patrık Koen, Krıstofer Ostın jáne Djon Sýını stýdentter men kásibı mýzykanttarǵa arnap sheberlik synyptaryn ótkizedi. Sheberlik synyptary Qurmanǵazy atyndaǵy Qazaq Ulttyq konservatorıasynyń qoldaý kórsetýimen uıymdastyrylyp otyr.
Alfred Hıchkoktiń toǵyz dybyssyz fılmin qalpyna keltirý maqsatynda BFI-diń Ulttyq muraǵaty uıymdastyrǵan «Hıchkok 9» jobasy qalpyna keltirý isi boıynsha qazirgi kúngi eń iri ári eń qıyn joba bolyp tabylady. 1925 jyldan bastap 1929 jylǵa deıingi aralyqta túsirilgen bul fılmder sheber rejıserdiń keıingi jumystarynyń negizin qalaǵan. Hıchkoktyń dybyssyz fılmderi uly rejıserdiń keıinirek túsirilgen shyǵarmalaryn túsiný úshin úlken mánge ıe jáne bul joba búkil álem kórermenderine rejıserdiń týyndylaryn jańa qyrynan ashýǵa múmkindik beredi.
