Qytaıdyń İshki Mońǵolıa aımaǵynda jergilikti sharýalar jerlerin qorǵap, ereýilge shyǵýda, - dep habarlaıdy Qamshy.kz.

Bul týraly İshki Mońǵolıa Adam quqyqtary jónindegi aqparattyq ortalyǵy habarlady.

Qazannyń 17-nen beri narazylyq bildirip jatqan malshylar qytaılyq COFCO Group ulttyq korporasıasynyń osyǵan deıin sharýalar paıdalanyp kelgen jaıylym jerlerine shoshqa fermasyn salýyna qarsylyq bildirýde. Sharýalar biraýyzdan qytaılyq kásiporyn jaıylym jerdi zańsyz ıelenip ketpek dep otyr.

İshki Mońǵolıanyń shyǵysynda ornalasqan Ongıýd hoshýý, Haılaas qalashyqtarynan jáne Sandag gasaa eldi mekenderinen kelgen júzden astam sharýa kompanıanyń qurylys alańyna jınalǵan.

Ereýilshiler qoldaryna «Bul bizdiń jerimiz! Ata-babalarymyzdan qalǵan jerler keler urpaqqa da qalýy kerek!», «Biz, mońǵoldar, biriksek – myqtymyz!» degen urandar ustaǵan.

Aqparat ortalyǵy taratqan habarlamada ereýilshiler «Jerimizdi Qudaıdyń ózi surasa da bermeımiz!» degen talap qoıyp jatqany aıtylady. Ortalyq bul sózdiń tarıhı uran ekenin, kezinde Jońǵar ımperıasyn manchjýr shapqynshylyǵynan qorǵaǵan mońǵoldardyń ulttyq batyry Galdan Boshıgt uran etkenin eske salýda.

Sharýalar sondaı-aq, qytaılyq kompanıanyń bul bastamasy tek malshylardy ata qonysynan aıyryp qana qoımaı, qorshaǵan ortaǵa da zıanyn tıgizetinine alańdaýly.

Negizgi nysandary Shandýn provınısıasynda ornalasqan COFCO kompanıasy taǵam ónimderin shyǵarýmen aınalysady jáne atalǵan aımaqta birneshe mıllıon shoshqa ósirýge múmkindik beretin alyp fermanyń qurylysyn bastap ta ketken.

Aqparat ortalyǵy ereýilshilerge qarsy polısıa jasaǵy men arnaıy tehnıka qoldanylǵany, birneshe sharýanyń soqqyǵa jyǵylǵanyn da habarlady.