​Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Álik Shpekbaev elimizdiń álemdik jemqorlyq reıtıńinde 2014 – 2016 jyldar arasynda 17 orynǵa kóterilgeni týraly baıandady, dep habarlaıdy «Qamshy» portaly  Today.kz-ke silteme jasap. Ol, bulaı dep Almatyda jemqorlyqqa qarsy kúres jónindegi otyrys barysynda aıtqan.

«Jemqorlyq taqyryby tek memleketti ǵana emes, qoǵamdy da alańdatady, bul problema barlyq elderde bar. Bizdiń elde jemqorlyq deńgeıi tym bıik bolǵandyqtan, biz álem boıynsha 123 oryndy ıelenip otyrmyz. Alaıda, júrgizilip jatqan jemqorlyqpen kúres saıasaty arqasynda 2014 – 2016 jyldarda biz 17 orynǵa kóterildik. Zań buzýshylyq ákimshilikterde de bar. Jemqorlyqqa qatysty bes myń oqıǵa anyqtaldy, onyń 10 paıyzy – asa aýyr qylmystar. Búgingi tańda jemqorlyqty azaıtýǵa baǵyttalǵan 59 zań qoldanysta. 2016 jyldyń toǵyz aıy ishinde Almatyda jemqorlyq áreketteri úshin 871 laýazym ıesi jaýapqa tartyldy. Jemqorlyqtyń eń tómengi deńgeıi Soltústik Qazaqstan oblysynda. Almaty ákimshiligi quramyndaǵy jemqorlyq jaılaǵan baǵyt – turǵyn úı qurylys», - degen Shpekbaev málimdemesinde.

 Sondaı-aq otyrys barysynda Almaty ákimi Baýyrjan Báıbek qalada jemqorlyqpen kúres jumystarynyń belsendi júrip jatqanyn málimdedi. Ol Almaty kóshelerinde 700 beınekameranyń ornatylyp, júıeniń tıimdiligin arttyrý úshin qosymsha jabdyq alý qajettigin aıtty. Qala boıynsha 4 mıllıard teńge kóleminde aıyppul jınalǵan.