2014 jyldyń 29 mamyrynda Astanada Qazaqstan, Reseı jáne Belarýs elderiniń Prezıdentteri Eýrazıalyq Ekonomıkalyq Odaqtyń qurylǵandyǵyn rastaıtyn qujatqa qol qoımaq. Alaıda kópshilik kóńilin alańdatqan kóptegen máseleler jaýapsyz qalyp otyr. Qazaq halqynyń tikeleı bolashaǵyna qatysty osy bir aýqymdy kelisim shart nege halyqtyń pikirimen sanaspaı esh talqylaýsyz júzege aspaq?! Osy istiń basy-qasynda júrgen biren-saran sarapshylar bolmasa, bylaıǵy jurt EEO-nyń ne ekenin de bilmeıdi. Máselen kópshilik úshin bul «Odaq» taza ekonomıkalyq dep jıi aıtylyp júr. Eger shynymen solaı bolsa, onda biz nege tek «Kedendik odaqpen» shektelmeımiz?! Álde odaqtyń aıasynda qol qoıǵan qujattar úsh eldiń ekonomıkalyq ara qatynasyna jetkiliksiz be?! Oǵan da qol qoıǵanymyz keshe ǵana emes pe?! Ol odaq óz múmkindigin áli tolyq ashyp kórsete de qoıǵan joq qoı. Onyń aıasynda atqarylatyn ister nege aıaqsyz qaldy?!
Shyntýaıtyna kelgende «Kedendik odaq» Qazaqstan úshin eshbir ekonomıkalyq ıgilik ákelgen joq. Eger 2011 jyly Kedendik Odaqtaǵy Qazaqstannyń ekonomıkalyq úlesi 20% bolsa, qazir 12 %-ǵa túsip, kún ótken saıyn odan da ári azaıý ústinde ekendigi aıqyndalyp otyr. Onyń ústine bizdiń taýarlarymyzdyń sany da kemip barady. Mamandardyń paıymdaýynsha tek sońǵy bir jylda bizdiń Reseıge jáne Belarýsıaǵa eksportymyz (ıaǵnı taýar satýymyz) 3,7 %-ǵa kemigen, al kerisinshe Reseı men Belarýs bul kórsetkishterin 12 %-ǵa arttyrǵan. Shyndyǵyna kelgende «kedendik odaq» Qazaqstan halqynyń turmysyn qymbattatyp jiberdi, Reseıdegi qymbatshylyq bizge de keldi. Tipti Belarýs Prezıdenti bir sózinde esh taısalmastan: «Reseı Qazaqstan men Belarýsti óz naryǵyna jibergisi joq, tipti kedergiler jasaýda» dep dóp basyp aıtty. Qysqasy «Kedendik Odaq» Qazaqstanǵa shyǵynnan basqa eshteńe ákelgen joq. Bul odaqtan tek Reseı ǵana paıda kórýde. Bundaı teńsiz jaǵdaıda EEO-ǵa qol qoıýǵa yntaly jaqtardyń shamadan tys asyǵýy bizdi qatty alańdatyp otyr. Ásirese Reseı basylymdarynyń memleketterdiń ústinen qaraıtyn qurylymdardyń paıda bolatyndyǵy jóninde jıi jáne batyl aıtyp júrgenderi kóńilge kirbiń uıalatady.
Reseı sheneýnikteriniń ortaq valúta, ortaq parlament, ortaq ekonomıkalyq rettegish organdar týraly másele kótere bastaýy Eýrazıalyq Odaqtyń basqa maqsattary bar ekendigin aıqyn kórsetip otyr. Basqa maqsat dep otyrǵandarymyz – búgingi Reseı bıliginiń ımperıalyq, shovınıstik pıǵyly. Bul pıǵyldyń túpki maqsaty – KSRO-ny qaıta jańǵyrtý ekendigi aıtpasa da túsinikti. Biz bundaı jaǵdaımen eshqashan kelispeımiz. Sebebi asyǵys jasalǵan sheshimniń erteńgi saldaryn búgingi Ýkraınanyń múshkil jaǵdaıynan kórýge bolady. Qyrymnyń qoldy bolýy Kremldiń ımperıalyq saıasatynyń aıqyn kórinisi. Bul jaǵdaı Reseıdiń qol qoıǵan halyqaralyq qujattary túkke turǵysyz ekendigin kórsetti. Ótken ǵasyr sońynda álem alpaýyttarynyń kepildigimen Qazaqstan ıadrolyq qarýdan bas tartty. Endigi jaǵdaıda sol kepildikterge senim arta alamyz ba?! Bizdińshe, Reseı úshin ol kepildikter men halyqaralyq qujattardyń quny kók tıyn.
Sol sebepti biz «Evrazıalyq Ekonomıkalyq Odaq» tek Qazaqstan ekonomıkasy úshin ǵana emes, Qazaq memlekettiligi úshin de qaýipti degen pikirdemiz!
Qalyptasqan jaǵdaıdy eskere otyryp, biz bılikke tómendegideı talaptar qoıamyz:
Taraptardyń Eýrazıalyq Ekonomıkalyq Odaqqa qol qoıýy keıin shegerilip, bul máseleni jalpyhalyqtyq referendým arqyly sheshý qolǵa alynsyn;
Bılik Qazaqstannyń «Kedendik odaq» aıasynda jetken jetistikteri ne bolmasa saldary jóninde tolyqqandy maǵlumat bersin.
Biz barsha Qazaqstan halqyn bizge qoldaý kórsetip, el, ult, táýelsizdik úshin, ulttyq múdde úshin bas qosýǵa shaqyramyz.
«Qazaq Ulttyq Keńesi» osy oraıda qurylǵan Antıeýrazıalyq forýmdy qoldaıtynyn jáne birlesip qımyldaıtynyn habarlaıdy.
26 mamyr 2014 jyl
