Keshe Qazaqstannyń halyq ártisi, akter, rejıser Tuńǵyshbaı Jamanqulovtyń «Fenıks» kórkem fılminiń túsirilimine bólingen qarajattan 69 mıllıon teńge jymqyrdy degen kúdikpen qamaýǵa alynǵany týraly habarlaǵan bolatynbyz.

Áleýmettik jeli men qoǵam belsendileri arasynda T. Jamanqulovtyń ustalýy qyzý talqylaýǵa túsýde. Pikir bildirýshilerdiń biri tanymal akterdyń ustalýyn qandaı da bir saıası ıntrıganyń saldary dese, bir top qarjy jymqyrý týraly joramalǵa senetinderin aıtýda.

Qamshy.kz tilshisi osy oqıǵaǵa oraı pikirlerin surap birneshe teatr, óner qaıratkerlerine habarlasqan bolatyn. Bir tań qalarlyǵy, habarlasqan azamattardyń deni atalǵan jaǵdaıǵa baılanysty qandaı da bir pikir bildirýden bas tartty.

Qazaqstannyń halyq ártisi, akter, rejıser Asanáli Áshimov T. Jamanqulovtyń ustalýy týraly eshteńe aıta almaıtynyn aıtty.

«Bilmeımin. Bul týraly eshqandaı habarym joq. Bilmegen soń ne aıtasyń. Eshteńe aıta almaımyn», - deıdi A. Áshimov.

Al, taǵy bir teatr aktery Bekjan Turys Almaty aýmaǵynan tys jerde júrgendikten bul habardy endi estip jatqanyn, mán-jaıǵa qanyq emestigin aıtty. 

Buǵan deıin, Qazaqstannyń teatr qaıratkerleri odaǵynyń kezekten tys jıynynda A. Áshimov T. Jamanqulovty T. Júrgenov atyndaǵy Qazaq Ulttyq óner akademıasynda oryn alǵan jaǵdaı týraly pikiri úshin synaǵan bolatyn.