Nursultan Nazarbaev NHK teleradıo habarlar taratý korporasıasy men «Kıodo Sýsın» aqparat agenttigine suhbat berdi. Aqordanyń feısbýktegi paraqshasy atalǵan suhbattyń vıdeosyn jarıalady, - dep habarlaıdy QazAqparat.
Áńgime barysynda Qazaqstan Prezıdenti elimizdiń ıadrolyq qarýdy taratpaý jáne qarýsyzdaný salasyndaǵy jumsaǵan kúsh-jigerine baılanysty saýaldarǵa jaýap berip, ıadrolyq arsenaldan bas tartý týraly sheshim qabyldaýǵa áser etken sebepter jóninde aıtty.
Sondaı-aq Memleket basshysy Qazaqstan men Japonıanyń ózara is-qımylynyń, sonyń ishinde ıadrolyq qarýsyzdaný salasyndaǵy yntymaqtastyqtyń perspektıvalaryn atap ótti.
Budan bólek, Elbasy óńirlik geosaıası úderistegi respýblıkamyzdyń róli jáne elimizdiń áleýmettik-ekonomıkalyq damýy týraly áńgimeledi.
«Men qazir óte jaqsy baılanystar, kelissózder júrip jatqanyn bilemin. Muny, Japonıamen senimge negizdelgen qarym-qatynastyń bolýyn Pýtınniń, Reseıdiń qalaıtyndyǵyn naqty bilemin. Sizderdiń aralaryńyzda araldarǵa baılanysty únemi másele kóterilip keledi. Bilesizder me, kóptegen elde mundaı sheshilmegen máseleler bar. Olar jaqsy, tatý, senimge negizdelgen qarym-qatynastar arqyly sheshiledi. Eger Reseı men Japonıa jaqsy ekonomıkalyq baılanystar, senim ornatyp, dostyq, ózara saýda-sattyq týraly shart jasasatyn bolsa ózge problemalar da sheshiledi. Men buǵan senimdimin. Óıtkeni, ol jerde ekonomıkadan góri saıasat basym edi. Sizderdiń taraptaryńyzdan da, bul taraptan da teketires joǵary boldy. Reseı men Japonıanyń jaqyndasqanyn qalamaıtyn ózge de oıynshylar da bar. Sondyqtan da qazirgi ýaqyttaǵy jumystar durys baǵytta órbip keledi»,- dedi Nazarbaev.
NHK teleradıo habarlar taratý korporasıasy men «Kıodo Sýsın» aqparat agenttigi Japonıadaǵy jáne jahandyq aqparat keńistigindegi jetekshi buqaralyq aqparat quraldary bolyp sanalady.
