Búgin Taldyqorǵan qalasynda ótip jatqan Almaty oblysynyń qylmystyq ister jónindegi mamandandyrylǵan aýdanaralyq sotynda sýdıa Berikjan Baıjúnisov Baqytbek Esentaevqa qatysty sot úkimin jarıa etti.

Bul týraly Qamshy.kz QazAqparatqa silteme  jasap habarlaıdy. 

Sýdıa   Baqytbek Esentaevty qatań rejımdegi kolonıada 9 jylǵa bas bostandyǵynan aıyrý týraly úkim taǵaıyndady. Aıta keterligi, Almaty oblysynyń qylmystyq ister jónindegi mamandandyrylǵan aýdanaralyq sotynda Esentaevqa qatysty qylmystyq is jabyq rejımde, alqa bılerdiń qatysýymen ótken bolatyn. Óziniń kóliginde jubaıyn zorlap, birneshe jerden pyshaqtaǵan Baqytbek Esentaev birneshe qylmystyq bap boıynsha aıyptalýda.

B. Esentaev QR QK-niń 24-bap 3-bólimi, 99-baptyń 2-bólimi 10-tarmaǵy (zorlaýmen nemese seksýaldyq sıpattaǵy zorlyq-zombylyq áreketterimen ushtasqan adam óltirýge oqtalý) 120-baptyń 1-bólimi (zorlaý) 121-baptyń 1-bólimi (seksýaldyq sıpattaǵy zorlyq-zombylyq áreketteri) boıynsha aıyp taǵylǵan edi. Esterińizge sala keteıik, Baıan Maqsatqyzy maýsymnyń ony kúni birneshe jerden pyshaqtalyp, aýyr jaraqatpen Talǵar aýdanyndaǵy aýrýhanaǵa túsken bolatyn. Belgili prodúser, eki balanyń anasy Baıan Maqsatqyzyn óziniń kúıeýi óltirmek boldy degen kúdikpen Baqytbek Esentaev ustalyp, qamaýǵa alyndy. Sondaı-aq qazirgi tańda Baıan burynǵy tegine qaıta oralǵan syńaıly. Ol áleýmettik jelidegi paraqshalaryna Baıan Maqsatqyzy degen ózgeris engizgen.