Qazaqstandyqtardyń ǵalamtorǵa talqylaýǵa shyǵarylǵan zań jobalary men ózge de normatıvtik-quqyqtyq aktilerge pikir bildirýi tómen.Bul týraly búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń kóshpeli otyrysynda elimizdiń Aqparat jáne komýnıkasıalar mınıstri Dáýren Abaev málim etti, - dep habarlaıdy QazAqparat.

«Mınıstrlik «Ashyq Úkimet» ınternet-portalyn tehnıkalyq qamtamasyz etý  jáne jumysyn jolǵa qoıý baǵytynda keń aýqymdy ister atqarýda. Búgingi kúni «Ashyq normatıvtik-quqyqtyq aktiler» portalynda ornalastyrǵan normatıvtik-quqyqtyq aktiler, onyń ishinde zań jobalary men memlekettik qyzmetter standarttary sany 4 myńnan asady. Olarǵa 120-dan astam pikir túsken», - dedi ol.

Osy rette mınıstr 4,5 myń jobaǵa nebári 120 ǵana komentarııdiń bolýy azdyq etetindigin basa aıtty. «Tipti, qazir biz usynyp otyrǵan aqparat jáne komýnıkasıalar máseleleri boıynsha zań jobasyna da jýrnalıser arasynda dúrligý bolǵanymen nebári 9 ǵana pikir qaldyrylǵan. Bul rette biz qarastyryp, anyqtaıtyn bolamyz. Múmkin prosedýra qıyndaý shyǵar»,  - dedi mınıstr.

Ol pikirlerdiń az bolýyn halyq arasynda túsindirý jumystarynyń jetkiliksiz  bolýymen baılanystyratyndyqtaryn ashyq aıtty.

Sonymen qatar  bul kemshilikti moıyndaıtyndyǵyn, ony joıý sharalary qolǵa alynatyndyǵyn atap ótti.

Sondaı-aq Abaevtyń aıtýynsha, aǵymdaǵy jyldyń 9 aıynyń qorytyndysynda búdjettik baǵdarlamalardyń ákimshileri «Ashyq búdjet» portalyna 3867 búdjettik baǵdarlamalar jobasyn ornalastyrǵan. Onyń ishinde búgingi kúni 365 joba jarıa talqylanýda. Munan bólek, atalǵan portalda búdjettik, shoǵyrlandyrylǵan jáne qarjylyq esepti qamtıtyn 1666 esep-qısap jarıa etilgen.