Tarazda bolǵan daýyldyń saldarynan úsh turǵyn jaraqat aldy. QR İshki ister Mınıstrliginiń tótenshe jaǵdaılar boıynsha komıtetiniń málimetine sáıkes, qazir operatıvti-qutqarý otrádynyń qutqarýshylary men komýnaldyq qyzmet mekemeleri qala boıynsha belsendi túrde jumys atqarýda. Olar synǵan aǵashtar men shaıqalǵan shatyrlardy jınaý ústinde.
Bul týraly Qamshy.kz Stan.kz-ke silteme jasap habarlaıdy.
Daýyldyń saldarynan Taraz memlekettik ýnıversıtetiniń shatyry ushyp ketken. Odan bólek qala boıynsha ondaǵan aǵashtar qulap, avtokólikterdi zaqymdaǵan.
Daýyl basylǵanymen, qalada áli de jel soǵyp tur.
«Tarazda elektr beretin 10 jeli qulady. Qazirgi ýaqytta elektr jaryǵynsyz qalǵan abonentter sany anyqtalýda. Jalpy aýmaǵy 2000 sharshy metrdi quraıtyn ǵımarattardyń shatyry julynyp ketti. Qazirgi ýaqytta apattyq brıgadalar jóndeý-qalpyna keltirý jumystaryn atqarýda. Ázirge dene jaraqatyn alǵan úsh turǵyn anyqtaldy. Olar Taraz qalalyq aýrýhanasyna jetkizildi», – dep habarlady QR İİM tótenshe jaǵdaılar boıynsha komıtetiniń resmı ókili Rýslan Imanqulov.
Aıta keteıik, keshe Jambyl oblysynda, onyń ishinde Taraz qalasy men Baızaq jáne Jambyl aýdandarynda qatty daýyl soqty.
