«TÝǴAN KÚN TOLǴANYSY»
Týǵan kúnińmen, Asqar - Bekzatym meniń, týǵan kúniń qutty bolsyn! Týǵan kún degende birge ótken talaı tátti kúnder eske túsedi.
1985 jyly biz Beıjińniń Sán-SHan taýynda alǵash ret týǵan kún toılap edik. Ol kúni men on toǵyzǵa, al sen jıyrmaǵa tolyp ediń. Bizdiń eń tamasha kúnderimizde tabystyryp, jalyndy jyldarymyzdy qaýyshtyrǵany úshin Allaǵa alǵys aıtamyn. Meniń týǵan kúnim senikinen birneshe kún buryn bolatyn. Stýdent kezimizde seniń qaltań menen góri "qalyń" edi. Sen únemi meniń týǵan kúnimdi eskerýsiz qaldyrǵandaı bolyp, qarashanyń jetisi kúni men saǵan týǵan kún syılyǵyn usynǵanda baryp, sen maǵan tosyn syı jasaıtynsyń. Ol meni qysylyp-qymtyrylyp qalmasyn degenińnen, aıalap-ardaqtaǵanyńnan edi. Iá, ol sen ediń, ol seniń janyń, seniń bolmysyń edi. Beıjińde turǵanymyzda bir qyz úıge telefon shalyp, seni izdedi. Men oǵan seniń úıde joq ekenińdi aıtyp, aty-jónin suradym: − Men bir qaryndasy edim, siz kimsiz? - deıdi áıel daýysy. "Men de qaryndasymyn ǵoı" deımin men. Sen kelgen soń saǵan ázildep: "Men senen bir jas kishimin - ol máńgi, endeshe, men de máńgi qaryndastaımyn", - dedim. Al búgin she, men aıtqandaı bolmady. Sen qartaımadyń, jasyń máńgi toqtady. Al men erteńge, egdelik jasqa jalǵyz ketetin boldym. Sonda meniń ertede aıtqan erkelik sózim ersi bolǵany ma?
Biraz jyl buryn meniń týǵan kúnimdi úıde toıladyq. Sen úıge qansha qyz shaqyryp, qyzmet jasatyp, aıryqsha ásermen, saltanatpen kemeline keltirip uıymdastyryp ediń. Al óziń hanzada beınesine enip, sýyryla sóılep, maǵan maqtaýlar aıtyp, álsin-áli bizdiń mahabbatymyzǵa madaq arnap tebirene júrgizip turdyń. Men yńǵaısyzdanyp, "Jasamys tarttyq emes pe, týǵan kúndi jas jubaılarsha jasaǵanymyz jarasyp turǵan joq sıaqty" dedim. Endi oılasam osynyń bári jazmyshtyń ádeıi ornalastyrýy sekildi. Biz 45 jasqa tolarda týǵan kúnimizge syılyq bolsyn dep "Mersedes" avtokóligine tapsyrys berip ediń. Avtokólikti alatyn kúni sen maǵan «Meni kút, túski asty birge ishemiz» dediń. Men seni tús aýǵansha kúttim. Saǵat úsh bolǵanda ǵana jańa mashınamyzǵa otyryp, endi meıramhana izdedik. Biraz jerden kólik qoıatyn turaq tappadyq. Túski asty ýaqytymen iship daǵdylaǵan meniń shydamym bitip oryndyq arqalyǵyna súıenip otyryp: «Otaǵasy, endi tústenbesek erteń tele arnalar jazady bizdi» - deımin. − Nege, ne dep ? –deısiń sen. − Eń sońǵy úlgidegi mersedes avto kóliginde eki adam ashtan ólipti degen sensasıa bolady,− deımin. Sondaǵy qarqyldap kúlgen daýysyń áli kúnge qulaq túbimnen jańǵyrady. Sen qyryq toǵyzǵa tolǵan kúni men Japonıaǵa úlgerip jetip, seniń janynda bolyp edim. Meıramhana seniń týǵan kúnińe sonshama ásem, ádemi bal kúlshe syılap edi. Qonaq úıge oralǵanda sen meniń qos qolymdy alyp, "Sen jettiń-aý, aqyry!"- dep, kóz jasyńdy tógip jiberip ediń. Al bizdiń sol joly bólingenimizge toǵyz-aq kún bolyp edi. Onda da men Japon elshiliginiń vızasyn kútip, Beıjińde qalyp qoıǵan bolatynmyn. Seniń elý jasyńdy biz emhanada ótkizdik. Aǵa-jeńgelerimiz, balalarymyz Beıjińge jınaldy. Qyzymyz qanshama shardy birden úrlep, palatany, korıdordy árlendirip júr. Ulymyz úrlegen sharlardy ustap ersili-qarsyly oınaq salady. Týystarymyz, dostarymyz, áriptesterimiz ár taraptan beıneli quttyqtaý joldady. Bizdiń kózimizde jas, kóńilimizde muń, júregimiz jylap turyp seniń týǵan kúnińe arnalǵan ottardy jaǵyp edik. Men ol kúnniń seniń sońǵy týǵan kúniń bolaryn oılamappyn. Sen jaraqatyńnan qansyrap, esten tanyp uzaq jattyń. Qaıtadan basyńdy kóterip, únsiz qalǵanyńda dárigerler qatty abdyrap, «Seni aqylyna kele almaıdy, qazir kisi tanymaıdy», - dedi. Men qaıterimdi bilmeı qarsy aldyńa baryp, - Asqar, men kimmin? - dedim. Sonda sen suq saýsaǵyńmen meni nusqap, sonan soń júregińdi kórsetkende, "meniń súıiktimsiń" degen sózdi estip turǵandaı bolyp edim. Bizdiń týǵan kúnimiz kele jatyr, Asqar. Týǵan kúnimiz qutty bolsyn! Biraq sensiz men ony qalaı toılaımyn? Sen menimen birge qartaıýǵa ýaǵda berip ediń, qaıdasyń endi? Eńiregenimdi, etegim jasqa tolǵanyn kóresiń be sen? Sen Germanıaǵa ketip tórt jyl boıy alystaýdyń azabyn tartyp edik ǵoı. "Sen endi eshqashan bólinbeımiz"- degensiń. Búıtip aıyrylamyz dedik pe? Bizdi adam aıyrǵan joq, Qudaı aıyrdy. Biz 31 jyl birge ómir súrdik. Bir birimizge kún saıyn emirenip, kún saıyn tebirenetin edik. Onymyzdy Qudaı kóp kórdi me eken? Solaı shyǵar. Erterek bilgende bálkim, basqasha jasar ma edik? Keshe kórgen aýyl búgin joq, ýaqyt qaıta aınalyp kelmeıdi, biraq sen barsyń, sen meni kóresiń, aıalaısyń, kútesiń. Sen meni týǵan kúnimmen quttyqtaısyń. Kóz jasymdy qurǵatasyń. Men de sóıtemin, týǵan kúnińmen Asqar! Týǵan kún máńgi toılansyn!
Jaına Jákýlına
28.10.2016 jyl Almaty
