Qytaıdyń komýnıstik partıasy tarapynan shyǵatyn «Global Times» gazeti AQSH-qa jańadan prezıdent bolyp saılanǵan jyljymaıtyn múlik mıllıarderi Donald Trampqa ashyqtan ashyq soǵys jarıalady.

Tramptyń Qytaıǵa «Ekonomıkalyq soǵys» ashýynyń aqymaqtyq bolatynyn basa aıtqan gazet, «Eger Tramp qytaı ónimderine qarsy kedendik salyq salatyn bolsa, esalańdyq, nadandyq, epsizdigimen aıyptalady» dep jazdy.

«Global Times» gazeti AQSH-tyń Qytaı ónimderine qarsy qandaı da bir shekteýler jasaıtyn bolsa, Qytaıdyń birden qarsy sharalar qoldanyp, jaýap berýge daıyn ekenin atap ótti. Qytaıdyń qarsy jaýap retinde AQSH ekonomıkasyna soqqy berý úshin iPhone men AQSH kólikteriniń elge kirýine, satylymyna tıym salatyny bir mysal retinde kórsetildi.

AQSH-ta 8 qarashadaǵy saılaýda jeńiske jetken Donald Tramp saılaý aldy úgit-nasıhatynda Qytaıdy nysanaǵa alyp, taýarlaryn kirgizbeıtinin, salyqty joǵarylatynyn aıtqan bolatyn.
Qytaıdyń AQSH-pen jasaǵan saýda sharttarynan orasan paıda taýyp otyrǵanyn aıtqan Tramp, «prezıdent bolyp saılansam Qytaıdan keletin ónimderge salyqty %45 arttyram» degen edi. Onyń bulaı aıtýyna, «eger Qytaıdan ónim satyp almasaq ózimiz óndiristi qolǵa alamyz» degen oıy sebep bolǵan.

Tramp sondaı-aq, tamyz aıyndaǵy bir málimdemesinde Qytaıdyń óz eksportyn arttyrý úshin qoldan valútalyq manıpýlásıa uıymdastyryp, ıýándi devalvasıalaý arqyly elge valútalyq aǵyn jasaıtyn «Álemniń eń úlken urysy» sózderin aıtqan bolaty.