Aıyptalýshy oryndyǵynda – úsh adam. Ekeýi qandy qylmysty jasaǵandar, al úshinshisi - múmkindigi bola tura qylmys týraly málimdemegen malshy. Sottyń búgingi aldyn ala tyńdalymynda, qos taraptyń týystary sózge kelip, shekisip qaldy.        

Bul týraly Ktk arnasy habarlaıdy.            

Sottyń tabaldyryǵynda bir-birine teris qaraǵan qos tarap. Biriniń –qaraýǵa beti joq, al biri ashý-yzasyn áreń ustaǵan. Tar dálizde ári qaraı birge turýǵa dáti shydamasa kerek, kúdiktilerdiń týystary aqyry syrtqa qashyp shyqty.           

Kámshat Ońalbaeva, kúdikti M.Ońalbaevtyń áıeli:

– Nege túrińizdi jabasyz? Báribir sotqa kiresiz ǵoı!  Endi jumys isteımin  tanıtyn el de kóp.  Uıat qoı, qoıshy.

Týystary uıattan órtengenimen, kúdiktiler erkin otyr. Tipti taǵylǵan aıyptarmen kelispeıtinin de sýdıaǵa kesip aıtty.    Bastapqyda kinásin moıyndaǵandaı bolǵan kúdiktiler osylaısha sotta taıqyp shyǵa keldi. Bireýi de ózin kinálimin dep otyrǵan joq. Talǵat Súleımenov qaraqshylyq faktisin de múlde joqqa shyǵardy. Uzynaǵash bazarynan úsh aǵaıyndyny 40 bas sıyrymen aýylǵa aldap aparyp, artynsha aıýandyqpen óltirdi dep aıyptalǵan osy Súleımenov pen Murat Ońalbaev. Al úshinshisi - marqumdardyń qalaı óltirilgenin kórgen, biraq oqıǵa týraly málimdemegen malshy. Jaýapkershiligin áli sezinbese kerek, qolhatpen úıinen kelip júrgen ol búgingi sotqa da araq iship kelipti. Jeti kún úndemeı jatqan Baıqasymovty sol sybaılastary ustap bergenin aıta keteıik. 

Baqyt Baıqasymov, kúdikti:

- Aýzym baılanyp qaldy bala-shaǵamdy oılap.  

-Nege jasyrasyń?

-Aıt shyndyqty.

Nege jasyrasyń?

-Bilmeımin,qorqyp kettim!  

Búgingi tyńdalymynda osy qandy qylmysqa qatysy bar delingen taǵy eki adamnyń aty ataldy. Olar - kúdikti Talǵat Súleımenovtyń ákesi men inisi. 

Erkin Beıseke, marqumdardyń týysy:

-Qarýdy Súleımenov Janaı berip otyr. Qylmysty Súleımenov Talǵat jasap otyr. Maldy Súleımenov Danıar alyp otyr. Famılıasy da úsheýiniń Súleımenov. Talǵat Súleımenov, Janaı, Danıar Súleımenov.

Ákeli –balaly qandy oqıǵa túni aýylda kútip, urlyq maldy túsirip alyp qalǵan eken. Biraq solaı bola tura iske tek kýáger retinde tartylýyna jábirlenýshi tarap kelispeı otyr.   

Atyshýly qylmystyq iste toppen adam óltirý, qaraqshylyq jáne zańsyz qarý alyp júrý syndy aýyr baptarmen aıyptar taǵylǵan. Biraq ta marqumdardyń týystary áli de «máıitti qorlaý» degen taǵy bir aýyr baptyń qosylýyn talap etip otyr. Óıtkeni, sot saraptamasy kórsetkendeı qandyqol qaraqshylar marqumdardy atyp óltirmes buryn olardy ábden azaptaǵan eken.

Iaǵnı, Jarqynbek, Qadilbek, Muqıat esimdi úsh aǵaıyndynyń jaýyryny men jaǵyn uryp syndyrǵan eken. Artynsha myltyqpen basynan, júrekten atqan. Negizgi sot otyrysy tórt kúnnen keıin bastalmaq, qandy oqıǵanyń búge-shúgesi sonda aıtaldy.