Qyzylordaǵa tıip turǵan Belkól kentiniń turǵyndary Saparovtar otbasyna kómek suraıdy. Osydan birneshe kún buryn gaz balony jarylyp, otanasy qaıtys bolǵan. Al otbasynyń bes múshesi aýrýhanada jatyr. Olardyń jaǵdaıyna alańdaǵan aýyldastary, barar jeri joq ekenin aıtyp, qaıyrymdy jandarǵa ıek artady. Bizdiń arnaǵa kómek suraı kelgen aýyl turǵyndary, sońǵy 1 aıda atalǵan kentte osymen 6 otbasy órtten zardap shekkenin aıtty.
Bul týraly Astana arnasy habarlaıdy.
Oqys jaǵdaı qarashanyń 2-sinde bolǵan. Saparovtardyń kenjesi 11 jastaǵy Dáýlettiń jadynda qalyp qoıǵan. Onyń aıtýynsha, keshkisin, ádettegideı, anasy teledıdar qarap, aǵa-jeńgesi men balalary kompútermen álek bolyp jatqan. Aıaq astynan qatty daýys shyǵyp, áp-sátte úıdiń qabyrǵalary qulaǵan. Dáýlet Myrzahmet: Gazdyn basqa kıgizip qoıatyny ushty da, gaz jerge qulady. Basynan aq aqty da, jaryldy. Sosyn meni aǵam qutqardy, mamamdy aǵam qutqardy, myna Sanjar men Qaraqatty mamalary qutqardy. Saparovtardyń ortanshy uly kómekke birinshi bolyp kelgen. Ol jumystan shyǵyp úıge betke alǵanda, alystan jalyndy baıqap úıine júgirgen. Alǵan jaraqattardan analary kóz jumdy. Aýyl halqy qarajat jınap, ony sońǵy saparǵa shyǵaryp salypty.
Ǵazıza Bakırova, týysy: Balalary jetim qaldy, jaǵdaılary aýyr. Endi shyqqannan keıin mynaý úıdiń qaı jaǵyna barady? Menim úıime barǵanymen, meniń úıim de shaǵyn. Bul balalardy qaı jaqqa aparamyn men? Kelin 45 prosent kúıgen, balamyz 25 prosent, ólim men ómirdiń arasynda jatyr.
Álimjan Tólegenov, Qyzylorda oblystyq medısınalyq ortalyqtyń balalar hırýrgi: Naýqastar túsken kezde jaǵdaılary óte aýyr boldy, otpen kúıgen jaraqattar óte tereń bolady. Bul sebepti kelgen kezde reanımasıaǵa jatqyzdyq úsh balany da. Qazirgi ýaqytta otdelenıede em alyp jatyr tolyq kólemde. Barlyq dári-dármekter jetkilikti. Qazirgi jaǵdaılary ortasha aýyrlyqta. Aýyl turǵyndary, qys bastalmaı jatyp, órtten zardap shekkenderdiń kóp ekenin aıtty. Sońǵy 1 aıda 6 úı órtten zardap shekken.
Baıan Toqsanbaeva, Belkól kentiniń turǵyny: Osy bir aıdyń kóleminde alty úı zardap shegip otyr, osy órttiń kesirinen. Al ol nege dep oılaısyzdar? Sebebi bul gaz joqtyqtan. Biz mynaý qalaǵa tıip turmyz. Kórshi turamyz Saparovtar otbasyna. Belkól kentiniń atynan sizderden surarym: osy Saparovtar otbasyna kómektesseńizder eken. Úlken oblys basshylyǵynan bolsyn, aýdan basshylyǵynan bolsyn, men degen azamattar bolsa, kásipkerler bolsa.
Nursultan Baımenov, Belkól kenti ákimi apparatynyń zańgeri: Kent ákimshiligi tarapynan alty aı kóleminde zańǵa sáıkes baspanamen qamtamasyz etiledi. Biraq aldaǵy ýaqytta turaqty baspana qajet. Óıtkeni Belkól ákimdigi tarapynan ondaı baspana joq. Endi kezektiligine sáıkes aldaǵy ýaqytta alady dep oılaımyz, qujattaryn daıyndap ótkizgen soń. Tótenshe jaǵdaı mamandarynyń dereginshe, gaz balonynda aqaý bolǵan bolýy múmkin.
Erbolat Sermanov, oblystyq TJD órtti memlekettik baqylaý bóliminiń bas mamany: Órttiń shyǵý sebebi anyqtalýda qazir. Osy jınaqtalǵan qujattardyń barlyǵy tergeý rettiligimen 2016 jyly 3 qarashasynda Qyzylorda qalalyq ishki ister basqarmasyna joldandy. Sot saraptamasy taǵaıyndaldy, qazir anyqtalyp jatyr. Órt bolǵanda, birinshi jarylys bolǵan ǵoı, gaz balony jarylys bolǵan negizinde. Órttiń aqaýy sol gaz balony aýzynan ıis shyǵýynan ǵoı. Densaýlyqty túzegen soń, aldymen qujattardy rásimdeýleri tıis. Kent turǵyndary bolsa, áleýmettik jeli arqyly da barlyq qaıyrymdy azamattardan kómek surap jatyr.
