Mádenıet jáne sport mınıstri sotqa bergen Eńlik Sydyqovanyń advokaty daýly oqıǵaǵa qatysty pikir bildirdi, - dep habarlaıdy Tengrinews.kz.

 Taıaýda mádenıet jáne sport mınıstri Arystanbek Muhamedıulynyń Eńlik Sydyqovany sotqa bergeni belgili boldy.

Qyzdyń advokaty Gúlnara Jýaspaeva onyń múddesin sotta tegin qorǵaýǵa kelisim berip otyr eken. Endi ol sotta qyzdyń aıtqan sózderin dáleldeýge tyrysamyn deıdi.

"Árıne, qolymyzda kózir bar, ony sotta jarıa etemiz. Oqıǵa tizbegin baqylap otyrsańyzdar, daý shyqqan kezde, ekinshi kúni men "eger mınıstr óz qyzmetinen ketpeı, Eńlikpen sottasatyn bolsa, ádiletsiz sot bolady" dep aıtqanmyn. Ol qazir Eńlikke tisin batyryp, sotta jeńip shyǵýy úshin barlyq ákimshilik quraldaryn qoldanyp jatyr", - dep málimdedi qyzdyń advokaty Gúlnara Jýaspaeva.

Sonymen qatar, advokat Eńlik Sydyqovaǵa jáne onyń týystaryna belgisiz adamdar qysym túsirip júrgenin, buǵan deıin mınıstrge taqqan aıyptaryn joqqa shyǵarýdy usynyp jatqanyn málimdedi. "Olardyń úıine birneshe ret baryp, Eńlikti Astanaǵa ushaqpen jetkizýdi usynypty, Astanaǵa jetkizip, olar Eńlikti vıdeoúndeý jazǵyzyp, aqsha úshin jasadym degizgisi kelgen", - dep málimdedi advokat.

Advokat Jýaspaeva sotqa kýáger retinde Eńlik Sydyqovany qoldaýǵa daıyn adamdardyń shaqyrtylatynyn atap ótti. "Olar sotqa kelip, kýáger retinde sóz sóıleýge, Eńlikti qoldaýǵa ýáde berdi. Qyzdar kóp, sotta qansha adam bolatynyn aıta almaımyn, biraq kóp. Biz barlyq vıdeony kórsetken joqpyz. Saqtaı turýymyz kerek", - dep habarlady Eńlik Sydyqovanyń advokaty.

Al mádenıet jáne sport mınıstriniń advokaty Eskendir Álimbaev óz kezeginde eger Eńlik Sydyqova aıyptaýlaryn joqqa shyǵarsa, Muhamedıuly aryzyn qaıtaryp alýǵa daıyn ekenin atap ótti. "Shyntýaıtynda mınıstr adamdy qylmystyq jaýapkershilikke tartýǵa nıeti joq. Eger ol óz aıyptaýlaryn joqqa shyǵarsa, mınıstr aryzyn qaıtaryp alýǵa daıyn. Jazalaýǵa nıeti joq. Qyzdyń bir jaǵdaılardyń qurbany bolǵanyn jaqsy túsinip otyrmyz, onyń aıtyp otyrǵan sózinde jasandylyq bar. Iaǵnı ol oılaǵanyn aıtyp otyrǵan joq, aldyn ala daıyndalyp qoıǵan mátindi oqyp otyr. Soǵan qaraǵanda oǵan bireý osyny aıt dep áser etken sıaqty. Túrli boljam aıtýǵa bolady. Biraq bul qyzdyń belgisiz bir jaǵdaılardyń qurbany bolýy múmkin ekendigin joqqa shyǵarmaıdy", - dedi mınıstrdiń advokaty.

Onyń aıtýynsha, mınıstr sotqa óz nıetimen emes, memlekettik qyzmetker bolyp, óz abyroıyn qorǵaýǵa mindettelgen soń beripti. 

"Mınıstr men Eńlik Sydyqova kezdespegen bolýy da múmkin. Sydyqova óz aıyptaýynda oqý ornyna túsý úshin rektormen kezdesýdi uıymdastyrýǵa onyń qabyldaý emtıhanyna keshigip qalǵany sebep bolǵan deıdi. Alaıda, taıaýda BAQ-tarda jarıa etilgen málimetterge qaraǵanda, Sydyqova 2011 jyly bul oqý ornyna túspegen. (...) 2011 jyly ol Qyzylordadaǵy basqa bir oqý ornyna túsken. Biraq vıdeoúndeýinde ol Almatydaǵy oqý ornyna túskisi kelgenin aıtady", - dep málimdedi Arystanbek Muhamedıulynyń advokaty Eskendir Álimbaev.

Eske salaıyq, Osyǵan deıin T. Júrgenov atyndaǵy Qazaq ulttyq óner akademıasynyń burynǵy stýdenti Eńlik Sydyqova mınıstrdi bóten oımen tıisti dep aıyptaǵan bolatyn. Vıdeoda qyz 2011 jyly Muhamedıuly rektor bolǵanda akademıaǵa aqshaǵa túsirip beretinin aıtty jáne ekiushty usynystar aıtty dep málimdeıdi. Al Muhamedıuly óz kezeginde bul málimdemeniń shyndyqqa janaspaıtynyn málimdegen. Osydan keıin BAQ-tarda taǵy bir qyzdyń mınıstri "tıisti" dep aıyptaǵany jaıly habar tarady. Al keıin QR mádenıet jáne sport mınıstri Arystanbek Muhamedıuly ar-namysy men abyroıyn sotta qorǵaıtyn bolatyny habarlandy.