Astanada ótip jatqan respýblıka sýdıalarynyń VII sezi barysynda Prezıdent Nursultan Nazarbaev jınalǵan sýdıalarǵa kezinde daýgerlerdi bir aýyz sózben toqtatqan qazaq bıleriniń sheshendik sózderin oqýǵa keńes berdi , dep habarlaıdy Baq.kz tilshisi.

«Bılerimizdiń isterin bárimiz bilemiz. Tóle bı, Qazybek bı, Áıteke bıdiń, ber jaǵynda Buqar jyraýdyń aıtqandaryn oqyp otyryńyzdar. Olar bir aýyz sózben eki jaqty jaqyndastyryp, daýlardy sheshti. Sózge toqtaǵan qazaq kelisimge kelip, aıyppulyn tóledi. Negizine keletin bolsaq, sodan beri onsha eshteńe ózgergen joq. Bastysy – ádildik. «Ádil bıde aǵaıyn joq» degen sóz bar. Qazaqpyz ǵoı, aǵaıynsyz, juraǵatsyz, jekjatsyz bolmaımyz. Degenmen, eldi tártipke keltirý kerek», - dedi Memleket basshysy.

Elbasy atap ótkendeı, memleket sottardy qoldap, sýdıalardy qorǵaý kerek, al olar óz sharýasyn jaqsylap atqarýy qajet.

Aıta keteıik, Astanada respýblıka sýdıalarynyń VII sezi ótýde. Mańyzdy jıynǵa sýdıalar korpýsy, Parlament depýtattary, ortalyq memlekettik organdardyń basshylary, zańgerler qaýymdastyǵynyń, halyqaralyq uıymdardyń, úkimettik emes uıymdar ókilderi men álemniń 10-nan astam elinen kelgen sarapshylar - barlyǵy 600 delegat qatysyp jatyr.

Respýblıka sýdıalarynyń sezi 4 jylda bir ret ótedi. Táýelsizdik jyldary ishinde alty sıez (alǵashqysy 1996 jyly) ótti. Mańyzdy jıyn sot júıesiniń damýy úshin aıryqsha strategıalyq mánge ıe. Olardyń árbirinde sottar damýynyń qorytyndysy shyǵarylyp, ózekti máseleler boıynsha sheshimder qabyldanady.