Búgin QR Syrtqy ister mınıstri Erlan Ydyrysov Qazaqstanǵa resmı saparmen kelgen Chexıanyń syrtqy jáne eýropalyq ister mınıstri Lúbomır Zaoralekpen kezdesti. Taraptar Praga qalasynda qazaqtyń uly aqyny Abaı Qunanbaevqa arnap eskertkish turǵyzýǵa ýaǵdalasty, dep xabarlaıdy QazAqparat tilshisi.
"Búgingi kezdesýde ekijaqty saýda-ekonomıkalyq, mádenı-gýmanıtarlyq jáne xalyqaralyq máseleler talqylandy. Qazaqstan men Chexıa arasyndaǵy yntymaqtastyqtyń jańa baǵyttaryn belgiledik. Biz Chexıanyń mashına jasaý, aýyl sharýashylyǵy men densaýlyq saqtaý salasyndaǵy úlken áleýetin bilemiz. Dál, osy baǵyttarǵa basymdyq beriledi. Qazirgi kezde Chexıa jerinde kóptegen qazaqtandyq stýdentter bilim alyp júr. Al mádenıet salasyna keler bolsaq, jaqyn arada Praga qalasynda bizdiń uly aqynymyz Abaıǵa eskertkish ornatylady dep senemiz", - dedi kezdesýden keıingi brıfıńte E.Ydyrysov.
Mınıstrliktiń baspasóz qyzmetiniń málimetine sáıkes, eki mınıstr Chexıanyń astanasy - Praga qalasynda Abaı eskertkishin ornatýǵa kelisti. Aldaǵy ýaqytta eskertkishtiń jeri anyqtalady. Ony qalanyń qaq ortasynda ashý josparlanǵan. Chexıa syrtqy ister mınıstri Lúbomır Zaoralek óz kezeginde qazaq tilinde amandasyp, Astanadaǵy qonaqjaılylyq úshin óz alǵysyn da qazaq tilinde jetkizdi. Sapar barysynda onyń Prezıdent N.Nazarbaevpen kezdesetini josparlanǵan. Budan bólek, Qazaqstan-CHexıa bıznes forýmyna qatysady. Aıta keteıik, L.Zaoralekpen birge kelgen delegasıanyń quramynda 30-dan astam bıznesmen, osy eldiń aımaqtyq damý mınıstri, sondaı-aq Astanadaǵy EKSPO-2017 kórmesindegi Chexıa pavılonynyń ulttyq komısary bar. E.Ydyrysovpen ótken búgingi kezdesý aıasynda QR Prezıdenti janyndaǵy basqarý akademıasy men Chexıanyń syrtqy ister mınıstrliginiń dıplomatıalyq akademıasy arasynda ózara yntymaqtastyq týraly memorandýmǵa qol qoıyldy.
