Ókinishke oraı, memleketke qatysy bar mekeme, uıymdar men laýazymdy tulǵalar tóńireginde jemqorlyq pen alaıaqtyqqa qatysty áńgime de ere júretin boldy. Muny paraqorlyqpen kúresýshi bas mekeme – memlekettik qyzmet isteri jáne jemqorlyqqa qarsy is-qımyl jónindegi agenttik te rastap otyr.

Agenttik júrgizgen morıtorıng kvazımemlekettik saladaǵy jemqorlyq oqıǵalary alańdaýshylyq týǵyzatynyn kórsetken.

Jaýapty mekeme jasaǵan taldaý ótken jylmen salystyrǵanda atalǵan salada jemqorlyq qylmystyń 1,5 ese óskenin (143-ten 202-ge) anyqtaǵan. Oryn alǵan qylmystar negizinen urlaý, laýazymdyq mindetterin shamadan tys paıdalaný, memlekettik satyp alýlar men memlekettik baǵdarlamalardy júzege asyrý kezindegi para alýshylyqpen baılanysty bolyp otyr.

Máselen, jemqorlyqqa qarsy qyzmet jaqynda ǵana «Báıterek Devolopment» AQ Basqarma tóraǵasynyń orynbasary Aslan Jaqypovty, atalǵan mekemeniń memlekettik baǵdarlamalardy júzege asyrý dıreksıasynyń basshysy Baýyrjan Áıtimbetov pen Ǵazız Sarıevti tutqyndaǵan bolatyn. Olar 28 mıllıon teńge kóleminde para alǵany úshin ustaldy. Sybaılas top Qazaqstannyń birneshe óńirindegi 13 mekemeni qosyp, «Nurly jol» baǵdarlamasyna dep bólingen qarajatty jymqyrý úshin úlken qylmystyq sqema da qurǵan kórinedi.

Jemqorlyqqa batqan kompanıa bir «Báıterek Devolopment» emes. Qarjylyq qylmystarmen kúresýshi agenttik «Astana EKSPO-2017», «Astana» áleýmettik-kásipkerlik korporasıasy» (ÁPK), «Jetisý» ÁPK», «Qazaqstan Temirjoly», «Qazaqtelekom» ulttyq kompanıalary, «Qorǵas» shekara mańy áriptestigi halyqaralyq ortalyǵy, «QazMunaıGaz ónimderi», t.b. kompanıalardyń da jumysyndaǵy biraz bylyqty ashty.

Agenttik bul mekemelerdegi jemqorlyq qylmystyń 55 paıyzy (112 qylmys) satyp alýlar tártibine baılanysty ekendigin alǵa tartady. Osylaısha, ózi – bı, ózi – qoja bolǵan ulttyq kompanıa qyzmetkerleri memlekettik satyp alýlar týraly zańnama talaptaryn aınalyp ótip, qazynanyń qyrýar qarjysyn jeke múddelerine paıdalanýdyń kózin tapqan.