Qazaqstan Respýblıkasy Táýelsizdiginiń 25 jyldyǵyn ótkizý aıasynda «Qýatty óńir – qýatty Qazaqstan» Ońtústik Qazaqstan oblysynyń Elordasy – Astanadaǵy kúnderi bastaldy.
Osy kúnderi «Qazaqstanda jasalǵan» aksıasynyń sheńberinde oblystyq ónerkásip óndirýshilerdiń kórmesi men aýyl sharýashylyǵy ónimderiniń jármeńkesi ótýde. Munda astanalyqtarǵa 300 tonnadan astam aýyl sharýashylyǵy ónimderi naryqtaǵy baǵadan 15-20 paıyzǵa arzan saýdalanýda.
Búgingi jármeńkege Astana qalasynyń ákimi Áset Isekeshev pen Ońtústik Qazaqstan oblysynyń ákimi Janseıit Túımebaev qatysyp, aýyl sharýashylyq ónimderimen tanysty. Óz kezinde oblys ákimi azyq-túlik baǵasynyń negizsiz ósýine jol bermeıtin mundaı jármeńkelerdi jıi uıymdastyrý qajettigine toqtaldy.
Sonymen, jalpy kólemi 304 tonna bolatyn ónimderdiń quramynda 60 tonna et jáne et ónimderi, 126 tonna kókónis, 29 tonna jemis-jıdek, 7 tn sút ónimderi, 5 tn shubat, 25 myń dana jumyrtqa, 40 tn baqsha ónimderi, 7 tn balyq, 7 tn bal, 3 tn ósimdik maıy men 5 tn keptirilgen jemis 15 tn basqa da ónimder bar.
Elordalyqtarǵa alyp kelgen aýyl sharýashylyq ónimderiniń jalpy quny 100,8 mln.teńgeni quraıdy. Eki kúnge jalǵasatyn aýyl sharýashylyǵy jármeńkesine 50-den astam óńirdiń taýar óndirýshileri sapaly ári balǵyn ónimderin turǵyndarǵa usynýda.
Ońtústik Qazaqstan oblysy aýyl sharýshylyǵy baǵytynda júıeli jumystar atqaryp, tolaǵaı tabystarǵa jetip otyr. Atap aıtqanda bıyl oblys sharýalarymen 470 myń tn. (2015j. 246 myń tn.) astyq jınalyp, túsimdiligi ortasha eseppen 22 s/ga. qurady. Bul Qazaqstannyń Táýelsizdik kezeńindegi eń úlken rekordtyq kórsetkish bolyp tabylady. Al jemis-jıdek daqyldary men júzimniń kópjyldyq ekpeleriniń kólemi jyldan - jylǵa ulǵaıý ústinde. Naqtyraq aıtsaq, 2008-2016 jyldar aralyǵynda jemis-jıdek daqyldary men júzimniń kópjyldyq ekpeleriniń egis kólemi 17,7 myń ga. bolsa, bıyl bul 30 myń ga jetkizildi.
