Otyrar aýdanynda júgeri klasteri damıdy. Bul týraly «Otyrar» telearnasy habarlady.

Aýdanda júgeri sharýashylyǵy jaqsy damyp keledi. Júgerini óńdeıtin kásiporyn da ashylǵan. Úkimettiń jergilikti jerlerde agrokeshenderdi damytý baǵdarlamasy aıasynda ashylǵan bul kásiporynda búginde 30-ǵa jýyq adam eki qolǵa bir kúrek tapqan. Solardyń biri — Aıgúl Medelhanova. Epti kelinshek kún saıyn 500 keli júgeri arshıdy. Kúndelikti tabysy ortasha eseppen 5-8 myń teńgeni quraıdy eken. Kásiporyn tyń tehnologıamen jumys isteıdi. Aldymen júgeri dáni sobyǵynan alynyp, keptiriledi. Sodan keıin qambalarda saqtalady. Keptiretin qural-jabdyqtar Anglıadan, saqtaý qurylǵylary Qytaıdan arnaıy aldyrylǵan.

Júgeri óńdeý zaýyty — Otyrar aýdanyndaǵy «Údemeli ındýstrıaldy-ınoovasıalyq damý», «Bıznestiń jol kartasy 2020» baǵdarlamalary aıasynda qolǵa alynǵan jobalardy júzege asyratyn ındýstrıaldy aımaqta boı kótergen alǵashqy kásiporyn. Taıaýda osynda júgeri klasterin damytý aıasynda daqyldy tereń óńdeıtin qos birdeı óndiris oshaǵy ashylmaq. Demek, júgeri sharýashylyǵymen aınalysatyn sharýalardyń aıy ońynan týǵaly tur deıdi mamandar.

Aıta keteıik, aýdannyń brendine aınalǵan daqyl bıyl 7 myń gektarǵa egilip, ár gektarynan 120 sentnerden ónim alynypty. Otyrar óńiri 2020 jylǵa deıin alqapty 15 myń gektarǵa jetkizip, júgeri klasterine jol ashpaq.

Otyrar aýdanyndaǵy ındýstrıaldy aımaq Sháýildir men Temir eldi mekenderiniń arasyndaǵy 97 gektarjerde qurylǵan. Qazirgi kúni munda 3 joba júzege asyp, qurylys jumystary júrip jatyr. Oblystyq kásipkerlik basqarmasyna 6 joba usynylýda.