Shyrt uıqyda jatqan balalar órt dabylynan shoshyp oıanǵan. Sóıtse, ekinshi qabattaǵy oıyn bólmesinen ot shyǵypty. Órt sóndirýshiler kelgenshe jalyn joǵaryǵa taralyp, nysannyń shatyryna deıin jetken.
Bul týraly Ktk arnasy habarlaıdy.
Gúlmıra Qundybaeva, №1 balalar úıiniń dırektory:
-Balalar oıyn bólmesi kádimgi, ol jerde televızor, dıvan, shkaf turǵan.
Qutqarýshylar kelgenshe osyndaǵy 161 bala men 12 qyzmetker tereze arqyly dalaǵa shyqqan. Al mamandar órtti bir saǵatqa jýyq ýaqyttyń ishinde aýyzdyqtady. Áp-sátte 180 sharshy metr aýmaqty qyzyl jalyn sharpyp úlgeripti. Tótenshe jaǵdaıdan 4 tárbıelenýshi men qyzmetkerlerdiń biri zardap shekken. Qazir túrli jaraqat alǵan jetkinshekter aýrýhanada em qabyldaýda.
Nurjan Isabekov, Almaty qalasy densaýlyq saqtaý basqarmasynyń bas hırýrgi:
- Bir naýqastyń keýde omyrtqasy synǵan. 3 naýqastyń ish qurylysynyń jabyq jaraqaty bar.
Negizi, bul mekemede ata-ana quqyǵynan aıyrylǵandardyń balalary turady. Qyzyl jalyndy óz kózderimen kórgen tárbıelenýshiler túndegi jaǵdaıdan ábden shoshyp qalǵan. Endi olarmen psıhologtar jumys istemek. Qazir balalar ǵımarattyń ózge bóligine jaıǵasty. Al órtenip ketken jerinde qutqarýshylar jumys isteýde. Olar bólmelerdi qırandydan tazartyp jatyr.
Ázirge órttiń naqty neden shyqqany belgisiz. Degenmen, tótenshe jaǵdaı qyzmetkerleri oǵan toqtan ajyratylmaı qalǵan turmystyq tehnıkalar sebep bolýy múmkin dep otyr.
Sandýǵash Baımuhambetova, Almaty qalalyq TJD resmı ókili:
- Órt ornynda razetkaǵa qosylyp qalǵan teledıdar jáne de útiktiń ólshemderi tabylǵan .Biraq, materıaldardyń bári jınaqtalyp, İshki İster departamentine jóneltiledi.
Baǵanashyldaǵy Almaty oblystyq №1 balalar úıi buǵan deıin de órt sóndirýshilerdiń nazaryna ilikken. Iaǵnı mekemeden maýsymdaǵy josparly tekseris kezinde 9 birdeı zań buzýshylyq anyqtalypty. Biraq eskertýden keıin onyń bári retke keltirilgen kórinedi. Al túndegi oqys oqıǵanyń naqty sebebi saraptamadan keıin málim bolady.
