Taıaý Shyǵystaǵy Katar men Qazaqstan arasynda joǵary saıası deńgeıdegi ózara senimdi qarym-qatynas qalyptasyp úlgerdi. Endi bul el Qazaqstanda ıslam bankıngin damytý máselelerin talqylamaq. Katar Qazaqstanda bank sektoryna ınvestısıa salýdy qarastyrýda. Bul týraly Astanada Katar Memleketindegi QR Tótenshe jáne Ókiletti Elshisi Asqar Shoqybaevtyń qatysýymen ótken baspasóz máslıhatynda málim boldy. Atap aıtqanda, Memleket basshysy N.Nazarbaevtyń 2015 jyldyń qazanynda Dohaǵa resmı sapary barysynda 2016 jyly Qazaqstanǵa Katardyń iri bıznes ókilderiniń sapary týraly kelisim jasalǵan bolatyn. Osy rette Elshilik tarapynan atalǵan eldiń memlekettik organdary men isker toptarymen birqatar kezdesýler ótkizildi.
«Katar jaǵy Qazaqstanǵa saparmen kelip, yntymaqtastyqty nyǵaıtýǵa ázirligin bildirip otyr. Katar Ortalyq banki tóraǵasynyń jetekshiligimen iri bankter basshylarynan quralǵan top elimizge bıylǵy tamyzdyń aıaǵynda saparlaıdy. Olar Qazaqstannyń bank sektoryna ınvestısıa salý, sondaı-aq elimizde katarlyq bankter fılıaldaryn ashý, ıslam bankıngin damytý máselelerin talqylaýǵa nıetti»,-delingen QR Syrtqy ister mınıstrligi málimetinde.
Sonymen qatar Katar memleketi Qazaqstanǵa turaqty túrde eki eldiń syrtqy ister mınıstrlikteri arasynda saıası keńesýler ótkizýdi usyndy. Bul týraly Astanada ótken baspasóz máslıhatynda Katar Memleketindegi QR Tótenshe jáne Ókiletti Elshisi Asqar Shoqybaev málim etti. «Yntymaqtastyq baǵytynda kóptegen oı-pikirlerimiz jáne josparlarymyz bar. Qazirgi kezde Katar memleketi bizge turaqty túrde eki eldiń syrtqy ister mınıstrlikteri arasynda saıası keńesýler ótkizýdi usynyp otyr. Iaǵnı, keńesýlerdi syrtqy ister mınıstrleri orynbasarlary deńgeıinde talqylaý usynyldy. Bizdiń syrtqy saıası vedomstvomyzda osy usynys qarastyrylyp jatyr. Osy rette ońtaıly sheshim bolady degen senimdemiz», - dep toqtaldy Elshi. Onyń sózine qaraǵanda, qazirgi kezde katarlyq SİM ókilderi Qazaqstan tarapynyń jaýabyn kútip otyr. Aıta keteıik, 1993 jyldyń 1 shildesinde Qazaqstan men Katar arasynda dıplomatıalyq qatynastardy ornatý týraly birlesken komúnıkege qol qoıyldy. QR Elshiligi Katarda 2007 jyldyń mamyrynda ashyldy, al Qazaqstandaǵy Katar Elshiligi 2008 jyldyń naýryzynan qyzmet etýde.
Atalǵan eldiń qazaqstandyq ınfraqurylymdyq qoryna kirýi týraly kelissózder taıaýda aıaqtalmaq. Iaǵnı, Katar tarapy qazaqstandyq ınfraqurylymdyq qoryna 100 mln. AQSH dollary kólemindegi ınvestısıamen kirmek. Bul týraly Astanada ótken baspasóz máslıhatynda Katar Memleketindegi QR Tótenshe jáne Ókiletti Elshisi Asqar Shoqybaev málim etti.
«Ótken jyly Astanaǵa Katar ınvestısıalyq qorynyń basshysy saparmen keldi. Ol elimizdiń resmı tulǵalarymen aıtarlyqtaı jemisti kelissózder júrgizdi. Qazirgi kezde bizde Katardyń Kazaqstandyq ınfraqurylymdyq qorǵa 100 mln. AQSH dollary úlesimen kirýi turǵysyndaǵy mańyzdy joba bar. Búginde osy baǵytta kelissózder júrip jatyr. Jaqyn arada bul másele sheshiledi degen úmittemin»,-dedi Elshi. Taratylǵan málimetterge qaraǵanda, Katar ınvestısıalyq qory Qazaqstanda basqa da aýqymdy jobalardy qarastyrýǵa daıar. Osy rette qor aýyl sharýashylyǵy salasyna qyzyǵýshylyq tanytyp otyr. Elshiniń aıtýynsha, jahandyq ekonomıkalyq daǵdarysqa qaramastan, Katar tarapy ınvestısıa salýdaǵy belsendigin joǵaltqan joq.
Sondaı-aq Katar eli Semeıde ıadrolyq synaqtardan zardap shekkender úshin saýyqtyrý ortalyǵyn salý boıynsha kelissózderdi jandandyrýǵa ázir. Bul týraly Astanada ótken baspasóz máslıhatynda Katar Memleketindegi QR Tótenshe jáne Ókiletti Elshisi Asqar Shoqybaev málim etti. Atap aıtqanda, bul joba Katar damý qorynyń qaraýynda jatyr. «Bul turǵyda jobalyq-smetalyq qujatnama boıynsha másele týyndady. Katar tarapy bul jobaǵa 20 mln. dollar bólýge daıar, ıaǵnı osy qarjy ortalyqtyń qurylysyn júzege asyrýǵa jetkilikti bolsa. Sondyqtan osy jobaǵa jaýapty Shyǵys Qazaqstan oblysynyń nemese Semeıdiń ákimdigi, sondaı-aq elimizdiń basqa da organdary atalǵan ınvestısıaǵa ortalyqty salýǵa daıar bolsa, onda Katar jaǵy kelissózderdi jandandyrýǵa ázir»,-dedi ol.
QR men Sıngapýrdyń yntymaqtastyq perspektıvalary da nazardan tys qalmaýda. Úkimet úıinde QR Premer-Mınıstriniń birinshi orynbasary Baqytjan Saǵyntaev Sıngapýr Respýblıkasy Memlekettik Saýda jáne ındýstrıa mınıstri, Memlekettik Ulttyq damý mınıstri Ko Po Kýnmen kezdesý ótkizdi. Taraptar Qazaqstan men Sıngapýrdyń arasyndaǵy eki jaqty qatynastardy damytýdyń jaǵdaıy men perspektıvalaryn qarady. Baqytjan Saǵyntaev pen Ko Po Kýn ózara saýda-ekonomıkalyq jáne ınvestısıalyq is-qımyldy arttyrý qajettigin aıtty. Premer-Mınıstrdiń birinshi orynbasary Qazaqstan áleýmettik-ekonomıkalyq damýdyń ozyq tájirıbesin belsendi beıimdep kele jatqan elderdiń biri ekenin aıtyp ótti. Atap aıtqanda, «Samuryq-Qazyna» Ulttyq ál-aýqat qoryn qurý, memlekettik qyzmettiń jańa úlgisin engizý, elektrondy úkimetti damytý jáne t.b. Kelissózder barysynda ónerkásiptik yntymaqtastyq, ınfraqurylymdyq jobalar aıasyndaǵy, qarjy salasyndaǵy ózara is-qımyl máseleleri talqylandy.
