Búgin Áleýmettik jelidegi negizi taqyryp - Elordanyń bekitilgen Astana degen esimin aýystyrý máselesi boldy. Bundaı bastamany Búgin QR Parlamenti palatalarynyń birlesken otyrysynda qaralyp jatqan «Táýelsizdiktiń 25 jyldyǵy Qazaqstan jetistikteriniń deklarasıasy» jobasynda Májilis depýtaty Qýanysh Sultanov aıtty.
Osyǵan oraı pikir bildirip jatqan jeli qoldanýshylardyń biri Janybek Alıken "Maǵan bir ǴALAMAT oı keldi! Petropavldyń atyn Nursultan dep aýystyraıyq. Quda da tynysh,qudaǵı da tynysh. Orystardyń da aýzy jabylady. Aıdaladaǵy Petr men Pavlǵa qaraǵanda Nursultan kókem jaqyn ǵoı. Onyń ústine bul jaǵympazdar báribir qoımaıdy,qylqyldap.", - dep jazdy.
Basqa da jeli qoldanýshylary Astana qalasy prezıdent Nazarbaevtiń jeke qoltańbasy ekenin alǵa tartyp, onyń esimin Elbasynyń ózi qoıǵanyn, eger aýystyrý qajet bolsa Petropavl men Pavlodar qalasynyń/oblysynyń ataýyn aýystyrý qajet ekenin atap ótti. "Soltústiktegi eki qala - Pývlodar men Petr-Paveldiń atyn aýystyrý naǵyz qıamettiń qaıymy bop otyr. Qala ataýy turypty, onda kóshelerge jańa ataý berýge qarsy shyǵyp jatqan dıaspora ókilderinen sol óńirlerdiń ákimderi de ımenetin sıaqty.
Tuńǵysh Prezıdentti jalpyhalyq bolyp saılaǵanymyzdyń, Táýelsizdiktiń 25 jyldyǵyn paıdalanyp, Qýanysh aǵamyz bar, Assambleıa bar, sol eki qalaǵa Nurqala, Nurkent degen sıaqty ataý bereıik degen usynys tastaǵanda tórt qoıandy bir oqpen atyp alar edik qoı deımin de. Sonda Tuńǵysh Prezıdentimizdiń esimin de ulyqtaımyz, Zaıyrly memleket sıpatymyzǵa tompaq keletin Áýlıeler atymen atalatyn qos qalanyń da máselesin shesher edik. Astanamen qatty baılanystyrǵylary kelse, bul jaqsy sheshim bolar edi" dedi áleýmettik jelide anonımdi jazba jarıalaǵan bir qoldanýshy.
Aıta ketetin bolsaq, bir qatar depýtattar Qýanysh Sultanovtyń bastamasyn qoldap, bul júzege assa Táýelsizdigimiz nyǵaıa túser edi degen mazmunda pikirler bildirip úlgerdi. Atap aıtqanda Májilis depýtaty Bekbolat Tileýhan "Nursultan atyndaǵy qalanyń bolǵany Táýelsizdiktiń sımvoly ispettes. Táýelsiz Qazaqstan men Nazarbaevtyń aty sınonımder sıaqty", - dep aǵynan jaryldy.
