Qazirgi zamanda jumys isteımin degen adamnyń eki qolyna bir kúrek tabylady. Óıtkeni, jumyssyz azamattarǵa memleket  úlken qamqorlyq tanytýda. Kepilge qoıatyn jyljymaıtyn múlkińiz bolsa nesıege tómengi paıyzben qarajat beredi. Bul jóninde buǵan deıin de gazet betinde jazylǵan bolatyn. 

Aıta keteıik, 2016 jyly  «Yrys» MQU» JSHS arqyly Tólebı aýdanynda jalpy somasy 143 mln. teńgege 45 joba maquldandy. Onyń ishinde 38 joba 138,6 mln. teńgege qarjylandyryldy.  Mal basyn kóbeıtýmen, bordaqylaýmen aınalysýǵa bel býyp, atalǵan uıymnan  2014 jyly 3 mln. teńge nesıe alǵan Tólebı aýdany, Qoǵaly aýyl okrýgine qarasty  Uzynaryq aýylynyń turǵyny Myqtybek Ospanov arnaıy «Úzdik joba» nomınasıasyn ıelendi.

– Bastapqyda 17 jylqy alyp, kásipkerlikti bastadym. Isim órge basty. Búgingi tańda ıeligimde 10 saýyn bıe, 15 bordaqylanatyn jylqym bar. Etin, qymyzyn ótkizip, otbasymyzben yryzdyǵymyzdy taýyp otyrmyz, – deıdi kásipker.

Aýylyna joldary túsip kelip qalǵan «Yrys» mıkroqarjy uıymynyń qyzmetkerlerine nesıe jónindegi óz usynysyn jetkizdi.

– Nesıeniń óteý merzimin sál uzartyp, paıyzyn tómendetse bolar edi. Sebebi, alty aı saıyn tólemaqy jasaý kásipti endi qolǵa alǵan  sharýaǵa ońaı tımeıdi.  Ony bir jyl merzimge deıin uzartsa tirligimizdi damytýǵa, kásibimizdi keńeıtýge múmkindik berer edi, – deıdi ol.

M.Ospanov jylqylardy sonaý Reseıden aldyrypty. Óziniń toǵyz gektar jońyshqa jáne bıdaı egetin jeri bar. Sonyń arqasynda jem-shóbin de erte bastan qamdap qoıǵan. Kelinshegi Zarına bıelerdi ár eki saǵat saıyn saýyp, eki kúnde 45-50 lıtrdeı qymyzdy aýyldaǵy saýdagerlerge ótkizedi.

Al, Qorǵan aýylynyń turǵyny Tursumbaı Zaıtenov 5 mln. teńge nesıege  10 jylqy, 10 buqa, 5 saýyn sıyr jáne 30 taýyq  satyp alyp, kásipkerligin óristetip otyr.  Aýyl turǵyndaryn arzan etpen, sútpen qamtamasyz etip  otyrǵandyǵynyń arqasynda «Yrys» MQU-nyń  «Úzdik joba» marapatyna ıe boldy. Mal baǵyp, onyń ónimi arqyly turmysyn túzegen jannyń bastamasyn aýyldastary da quptaýda.

«Qımyldaǵan qyr asady» degen qaǵıdany ustanǵan jandar osylaısha kásibiniń násibin kórip otyr.

Baıan DARǴOJINA, «Ońtústik Qazaqstan» gazeti