Elbasy Qazaqstannyń áleýmettik-ekonomıkalyq damý máseleleri jóninde keńes ótkizdi. Bul týraly "Qamshy" portaly Aqorda baspasóz qyzmetine silteme jasap habarlaıdy.
Keńeske premer-mınıstr B.Saǵyntaev, Prezıdent Ákimshiliginiń basshysy Á.Jaqsybekov, Ulttyq bank tóraǵasy D.Aqyshev, premer-mınıstrdiń birinshi orynbasary A.Mamın, premer-mınıstrdiń orynbasary - Aýyl sharýashylyǵy mınıstri A.Myrzahmetov, premer-mınıstrdiń orynbasary I.Tasmaǵambetov, Prezıdenttiń kómekshisi Á.Smaıylov, Densaýlyq saqtaý jáne áleýmettik damý mınıstri T.Dúısenova, Qarjy mınıstri B.Sultanov, Ulttyq ekonomıka mınıstri Q.Bıshimbaev qatysty.
İs-shara barysynda mańyzdy baǵdarlamalyq qujattarǵa qatysty negizgi ustanymdar qarastyryldy.
Memleket basshysy jınalǵandarǵa arnaǵan sózinde bıylǵy qyrkúıekte Úkimettiń keńeıtilgen otyrysynda tıisti tapsyrmalar berilgenin aıtty.
Nursultan Nazarbaev agrarlyq sala máseleleri jan-jaqty qarastyrýdy talap etetinin atap ótti. Ónim kólemin ulǵaıtý, ónimdilikti arttyrý, aýyl sharýashylyǵy óndirisin ártaraptandyrý, azyq-túlik ımportyn azaıtý, óńdelgen ónim eksportyn kóbeıtý jáne aýyl sharýashylyǵy kooperasıasyn jetildirý agroónerkásip keshenin damytý jónindegi memlekettik baǵdarlamanyń basymdyǵy bar baǵyttary bolyp sanalady.
"Bizdiń óńdeýshi kásiporyndarymyz 30-40 paıyz júktememen jumys júrgizýde. Olardyń jumysynyń tolyq qýattylyǵyna jetýin qamtamasyz etý úshin shıkizat kerek, onyń jetkiziletin mólsherin arttyrý úshin aýyl sharýashylyǵy kooperasıasyn damytý qajet", - dedi Qazaqstan Prezıdenti.
Sondaı-aq, Elbasy ózin-ózi jumyspen tıimsiz qamtyp otyrǵandardyń úlesi edáýir ekenin atap ótti.
"Halyqtyń bul sanaty ózin-ózi jumyspen tıimdi túrde qamtý úshin júıeli sharalar qabyldaý qajet. Jumyssyzdardy bos jumys oryndary bar jerlerge tartý kerek. Óńirlerdegi azamattar jumyspen qamtý baǵdarlamalary jáne bos oryndar týraly bilýge tıis", - dedi Memleket basshysy.
Sonymen birge, Nursultan Nazarbaev aýyl jastaryn qaıta daıarlaý jáne aýyldaǵy jumyspen qamtylý deńgeıin arttyrýdyń mańyzdylyǵyna toqtaldy.
Keńes aıasynda premer-mınıstrdiń orynbasary - Aýyl sharýashylyǵy mınıstri A.Myrzahmetov, Densaýlyq saqtaý jáne áleýmettik damý mınıstri T.Dúısenova jáne Ulttyq ekonomıka mınıstri Q.Bıshimbaev baıandama jasady.
Keńes qorytyndysy boıynsha Nursultan Nazarbaev ázirlenip jatqan baǵdarlamalyq qujattardyń tujyrymdyq ustanymdaryn maquldap, barlyq máseleni múddeli taraptarmen ózara kelisip, muqıat qarastyrýdy tapsyrdy.
