«Atyraýlyq jigit áleýmettik jelidegi sýret úshin áıelin óltire jazdady» degen jańalyqty «Aqjaıyq» gazetinen oqyp qaldyq da jaǵamyzdy ustadyq. Sońǵy kezde áıelin uryp-soqqan «erkekter» týraly jańalyqty kóp estıtin boldyq. Sóıtsek, Baıannyń kúıin keshgen kelinshekter elimizde kóp eken. Olar jaıynda kóp aıtyla bermeıdi, BAQ jaza bermeıdi. Másele kóbine jabýly qazan kúıinde qalady. Biraq myna bir oqıǵanyń jóni bólek eken. Oqıǵa oıdan alynbaǵanyn aıta keteıik.
Atyraý qalasy prokýrorynyń orynbasary Aıbek Qanatbekovtyń aıtýynsha K. esimdi er-azamat «Vkontakte» áleýmettik jelisinde óz áıeliniń basqa erkekpen birge túsken fotosyn kórip, yzaǵa býlyǵyp, qyzǵanysh órtine oranady. Emosıasyn baqylaı almaǵan K. óz áıelin aıaýsyz taıaq astyna alyp, sosyn as úıdegi pyshaqpen pyshaqtaıdy. Áıeldiń janyn aq halattylar abyroı bolǵanda aman saqtap qala aldy. «Dene jaraqatyn qasaqana salǵany úshin» QR QK 106-shy babynyń 1 tarmaǵy boıynsha is qozǵalyp, qyzǵanshaq kúıeý sot úkimimen 3 jylǵa bas bostandyǵynan aıyryldy.
Áleýmettik jeliniń qanshalyqty yńǵaıly qarym-qatynas quraly ekendigin bárimiz jaqsy bilemiz. Biraq onyń zardabyn da ońbaı tartýdamyz. «Vkontakte», «Instagramm» bolsyn adamnyń jeke ómirin jalpyǵa jarıa dúnıe etti. Ol jerde ánshini qushaqtap sýretke túsý, jurttyń kózinshe sezim bildirý, arqany keńge jaıyp qydyrý sándi. Nátıjesinde erli-zaıyptylar arasynda kıkiljińder týyndaýda, eki adamnyń arasynda renish paıda bolýda, kórseqyzarlar men qarǵys aıtýshylar kóbeıýde, jyltyr dúnıege qyzyǵýshylardyń sany artýda. Súıikti jarynan japa shekken áıel kimmen, qandaı pozada fotoǵa túskenin bilmeımiz. Ol sýret etıkaǵa saı boldy ma, bolmady ma degen suraqqa da portal, ókinishke oraı, jaýap bere almaıdy. Bar biletinimiz – barlyq pále kezinde tilden bolýshy edi, búgingi tańda pále ataýlysy qyzǵanyshtan-kózden.
