Qytaıdyń Shyńjań óńirindegi İle, Altaı, Tarbaǵataı aımaqtaryn bizdiń jurt «arǵy bet» deıdi. Sol arǵy betten Atajurtqa oralǵan qandastarymyzdyń qatary qalyń búginde. Degenmen, bıylǵy jyl basynda Kóshi-qon týraly zańǵa engizilgen ózgerister Otanym dep kelgen talaı «oralmandy» adam aıtsa sengisiz qıyndyqtarǵa tap qylyp otyr. Bul týraly aıtýyndaı aıtyp, jazýyndaı jazyp kelemiz. Mine, sol keri ketken Zańnyń alǵashqy «nátıjesi» kórine bastady.

Taldyqorǵandaǵy «Alash jurty» qoǵamdyq birlestiginiń jetekshisi Anarhan Erǵazynyń habarlaýynsha, 100-ge jýyq otbasy attyń basyn keri burǵan. Al taǵy da kóshemiz dep otyrǵandardyń qatary budan da kóp kórinedi. Anarhannyń aıtýynsha, munyń bári Kóshi-qon týraly zańǵa engizilgen sońǵy ózgeristerdiń kesiri. Aıtalyq, óz kúshimen kelgen aǵaıyn turaqty tirkeýge tura almaıdy, azamattyqqa qujat ótkize almaıdy, yqtıar hat ala almaıdy. Onymen qoımaı osy qujattardyń bir ushyn Qytaı konsýlyna tirep qoıǵan. Olarǵa barsa «Qazaqstan ókimeti qazaqqa azamattyq bere me, bermeı me? Oǵan bizdiń qatysymyz joq. Qazaqstannyń ishki isine aralaspaımyz» dep at-tonyn ala qashatyn kórinedi.

Sóıtip, bar ýaqytyn Kóshi-qon polısıasynyń esigin tozdyrýmen ótkizgen aǵaıyn vızasynyń merizmi aıaqtalǵan soń «Zańsyz kelimsek» atanyp, keri qaıtyp jatyr. Osy máselege baılanysty Almaty oblystyq kóshi-qon bóliminiń qyzmetkeri Qurmetbek Sansyzbaı myrzaǵa habarlastyq. «Oralmandardyń qujat máselesi tikeleı Kóshi-qon zańyna baılanysty. Sondyqtan qoldanystaǵy zańǵa ózgeris engizilgenin kútkenimiz jón. Meniń bilýimshe, bul máseleni Úkimet basshysy Kárim Másimov myrza tikeleı qadaǵalaýynda ustap otyr. Jaqynda jaqsy jańalyqtar bolyp qalýy múmkin», - deıdi ol.

Aıtpaqshy, byltyr Mońǵolıaǵa keri kóshken 70 otbasynyń jaıyn bilgen Elbasy Nursultan Nazarbaev óziniń Dúnıejúzi qazaqtarynyń qaýymdastyǵyndaǵy orynbasary Talǵat Mamashevqa shúılikken bolatyn. Keıin estigenimizdeı Mońǵolıa Prezıdenti Sahıagıın Elbegdorj sol aǵaıyndarǵa azamattyq berip, elderinde qaldyrypty.

Esterińizde bolsa, osy sáýir aıynda QR Eńbek jáne halyqty áleýmettik qorǵaý mınıstri Tamara Dúısenova Kóshi-qon zańyna ózgerister engiziletinin, elge oralǵan aǵaıynǵa dańǵyl jol ashylatynyn súıinshilegen. Odan beri de 3 aı ýaqyt ótti. Qandastardyń úmiti sý sepkendeı basylyp barady. Al Qazaqstannyń aldynda 2020 jyly 20 mıllıonǵa jetemiz degen úlken maqsat tur. Mundaı jaǵdaıda ol maqsat kimderdiń esebinen oryndalady, qalaı oryndalady?.. Oryndala ma? Álde Qazaqstannyń endigi halqy shetelderden shekteýsiz kelip jumys isteıtin gastarbaıterler bola ma?