Talǵardaǵy «Nur», Qapshaǵaıdaǵy «Káýsar» jáne t.b qaraýsyz qalǵan, shet aımaqta ornalasqan balalar úıiniń syıly qonaqtary jáne Qarttar úıine aıyna 2-3 ret bas suǵyp, jylyna 2-3 ret «100 ata-apa keshin» uıymdastyratyn, balalarǵa qýanysh syılaıtyn «Ertegiler álemi» merekesin ótkizgen, kúz aıynda 66 balany mektepke kıindirgen, osylaı iri-usaq sharalarymen kózge túsken «Qaıyrymdy jandar» tobyna 25 qarashada resmı túrde bir jyl toldy. Alǵash bul top Aıdyn Toqsanbaevanyń bastamasymen qurylǵan bolatyn. Tamasha ıdeıany qoldaýshylar halyq arasynan kóptep tabyldy. Keıinnen Aıdyn hanym jeke máselelerine baılanysty jetekshilikti toptyń belsendi múshelerine tabystady. Qazir uıym jumysyn Máýlen Alǵazy jáne Nazerke Bazarbekova júrgizip otyr. «Qaıyrymdy jandar» tek Almatyda ǵana emes, Astana, Shymkent, Aqtaý, Taraz, Aqtóbe qalalarynda da ashylǵan. Sóıtip «qaıyrymdy jandar» eriktiler toby eshqandaı memlekettik tirkeýde joq bolsa da qoǵamnyń nazaryn aýdaryp, qazirgi ýaqytta Qazaqstanda eń belsendi toptardyń biri bolyp sanalady. Osyndaı saýapby mol sharalardy atqara júrgen olar qyrkúıek aıynyń 22-si kúni 11-jasar Janel Jaılaýovanyń oqıǵasymen tanysady.
Týǵanynan júreginde aqaýy bar qyz únemi dárigerlerdiń baqylaýynda bolyp, jyl saıyn mindetti túrde aýrýhanada emdelip shyǵatyn. 6-shy synypqa kóshkende densaýlyǵy nasharlap, qaıta-qaıta qusyp, álsireı bastaıdy. Janeldiń eki búıregi isten shyqqanyn, tez arada ota jasatý kerek ekenin dárigerler anasyna habarlap aıtady. Qaıyrymdy jandardyń eriktileri dereý arada qımyldap, aqparat jaǵynan jáne qarjy jaǵynan qalaı jumys júrgizetindikterin oılastyra bastady. Eń áýeli, Qiwi men Altynbank-te shot ashylyp, halyqty qulaqtandyra bastaıdy. Alǵashqy sharalardyń biri - kóshe konserti. Arbatta qazaqtyń áýenderin aıtyp, "dombyra party" uıymdastyrdy. Sondaǵy 2 saǵat ishinde 50 000 teńge jınaı alǵan. Keıin "qaıyrymdy jandardyń" qyzdary ár túrli táttiler pisirip, úsh jerde jármeńke uıymdastyrǵan bolatyn. Jınalǵan aqshaǵa arzan baǵamen alma satyp alyp, almany qaıta satqan eken. Alǵashqy mıllıon osylaı jınalady. Osylaı Almatyda ár túrli sharalar uıymdastyrylyp, nátıjesinde «Almaty qaıyrymdy jandar» taza óz eńbekterimen 4 500 000 teńge jınap berdi. San túrli merekelik sharalar ótkizip 1 200 000 teńgeden astam qarjyny «Aqtaý qaıyrymdy jandary» aýdarsa, «Shymkent qaıyrymdy jandary» arzan baǵamen tosap satyp alyp, qymbatqa satý arqyly 500 500 teńgeni Janeldiń shotyna salyp jibergen. Jaqynda ǵana qurylǵan «Jezqazǵan qaıyrymdy jandary» bir aptanyń kólemińde 200 000 teńge jınaı bergen. Danıar myrza bastaǵan «Bolashaq» baǵdarlamasymen London qalasyna ketken stıpendıanttardan shotqa 347 000 teńge tústi. Sondaı-aq, barlyǵy zańdy túrde bolýy úshin Janeldiń anasy Aqmaral Jaqsylyqovamen «qaıyrymdy jandar» arasynda kelisimshart jasaldy. Kelisimshartta jınalǵan aqsha tek qana Janelge jumsalatyny kórsetilgen.
Ota buıyrtsa kelesi aptaǵa josparlanyp otyr. Dárigerler quramy tolyǵymen naqtylanǵan joq. Biraq, ota Almaty qalasynda ótetini anyqtaldy.
Qalamqas: Qazirgi tanda Janeldiń densaýlyǵy qalaı? Otaǵa moraldy turǵysynan daıyn ba?
Aqmaral Jaqsylyqova: Qazir kúndelikti analızderin ótkizip jatyr. Jańa aýrýhanaǵa aýysqan soń ba, úırene almaı jatyr. Ýaqyt jaqyndaǵan saıyn kúnde, túnde jylap, «mama, meni alyp ketshi» - deıdi.
Qalamqas: Donordy tabý qıynǵa soqtyrǵan shyǵar. Sol donor estýimshe sizdiń alys týysqanyz eken, sol donorǵa kómegi úshin aqsha tóleısizder me?
Aqmaral Jaqsylyqova: Ol adam óziniń aty-jónin aıtpaýyn ótindi. Bir qyzyǵy, «maǵan osynsha aqsha tóleısińder» dep aıtqan joq. Biraq, meniń balama kómektesip otyrǵan adamǵa qalaı raqmetimdi aıtpaımyn?!
Qalamqas: Úkimet jaqtan kómek boldy ma?
Aqmaral Jaqsylyqova: Ánshiler men depýtattarǵa habarlastyq. Telefondaryn kótermeı, kórip tursa da jaýap bermegender boldy. Qarajat jınalǵanda senbestik tanyttym.2 aı 10 kúnniń ishinde osyndaı qomaqty aqsha qalaı jınaldy dep tań qaldym. Janel ekeýmiz qushaqtasyp jylap aldyq. Maǵan kómektesken mıllıonerler emes, depýtattar emes, qarapaıym halyq. Osyndaı qarapaıym, júrekteri meırimge toly jastarymyz kóp ekenine kózim jetti.
Qalamqas: Máýlen, sizderdi osyndaı jetistikterińizben quttyqtaımyn. Osy sharalarda oılanatyn, tań qalatyn jaǵdaılar boldy ma?
Máýlen Alǵazy: Boldy. Qymbat kıinip, ámıanyn toltyryp alǵandardyń 200 teńge berip ketkenin kórdik. Al qarapaıym ǵana adamdar 5000 teńge aqshasyn qaltadan shyǵaryp, bar aqshasymen bizben bólisti. Bul qaıyrymdylyq úshin qandaı da bir statýstyń kerek emestigin kórsetedi.
Janeldiń anasy Aqmaral Jaqsylyqova Aıdyn Toqsanbaeva, Máýlen Alǵazy bastaǵan barlyq «qaıyrymdy jandarǵa», qarapaıym jandarǵa rızashylyǵyn bildirip, aq tilegin aıtty.
Al biz "Qamshy" portaly Janelge jáne onyń otbasyna densaýlyq tileımiz.
Qamshyger: Qalamqas Nurlanqyzy
