Qaıym murasyn jınaqtaýshy, "Qaıym Muhamedhanov atyndaǵy bilim jáne mádenıet qorynyń" dırektory Dına Qaıymqyzynyń arhıvinen ǵalymnyń 1986 jyly Jeltoqsan kóterilisine arnap jazylǵan óleńi tabyldy. Óleń arab grafıkasymen jazylǵan. Búgingi grafıkaǵa túsirgen tarıh ǵylymdarynyń kandıdaty Amantaı Isın.
JAMALITTENOVKE! (KOM - N)
Halqyn satyp, qanǵa bókken qandy aýyz,
Jemtik jalmap, jalańdaǵan jalmaýyz.
Qý qulqynǵa qul bolǵan sum, surqıa,
Sen - aram nıet, sen – qarabet, sen – jaýyz!
Itten týyp, innen shyqqan sekildi,
Kóz kórmesin arsyz qara betińdi.
Kúńirenip, kókke saýyp aq sútin,
Seni tapqan qaıran ana ókindi!
Máńgúrt-dońyz otyrdy-aý dep tórimde,
Ǵulamıtdın dóńbekshidi kórinde.
Ata-anańnyń qarǵys atqan júzqara
Qarańdy óshir, jat ókirip kórińde!
Qyzyl qyrshyn qazaqtyń qyz-uldaryn,
Adal júrek, ar-namystyń quldaryn
(Máńgi baqı el esinen keter me)
Sógip, soǵyp, qanyn tógip qyrǵanyń!
Tunshyǵarsyń sháıitterdiń qanyna,
Jantalasyp, saıa tappaı janyńa.
Qara jerde titirkenip, jırenip,
Jan jolamas ólekseńniń mańyna!
12.05.1407 – 20.12.1986. Qaıym Muhamedhanov
Qaıym Muhamedhanov Amantaı Isınniń óleńge jazǵan komentarııi: «Máskeýdiń saıası dıktatýrasyna bolǵan qarsylyqty bıliktiń jalǵan nasıhattaýyna jáne 1986 jylǵy Almatydaǵy Jeltoqsan kóterilisi aıaýsyz basyp-janshylǵan keıingi kúnderde jazylǵan, ashýly óleń. «Jamalıttenov» (solaı jazylǵan) degen famılıanyń astarynda, 1986 jyly halyq qozǵalysyn qaralaýshynyń rólin atqarǵan Qazaqstan Kompartıasy Ortalyq Komıtetiniń hatshysy Kamlıdenov bolýy múmkin. Ony kóptegen adamdar Jeltoqsan tragedıasynyń eń negizgi sebepkeri retinde sanady. Taqyryptan keıingi jaqsha ishindegi «kom-n» degen sóz, qysqartylǵan «komýnısen» degen sóz bolýy múmkin. Hıdjra boıynsha datadan soń, jalpy qabyldanǵan jyl sanaǵy qoıylypty».
