Táýelsizdiktiń 25 jyldyǵyna oraı 3-4 jeltoqsan kúnderi Almatyda «Altyn dombyra» atty alaman aıtys ótti. Bas júldesi Muhtar Nıazovqa buıyrǵan aıtystyń nátıjesi «Qamshy» portalynda jarıalanǵan bolatyn.

Aıta ketsek, Nıazovqa «Altyn dombyra» músinimen qatar, 3 mıllıon teńge syıaqy berildi. 1-oryn Bolatbek Orazbaevqa (2 mln teńge), 2-oryn Jansaıa Mýsınaǵa (1 mln teńge) buıyrdy. Al 3-oryn Serikzat Dúısenǵazy, Meıirbek Sultanǵazy, Iranǵaıyp Kúzenbaev pen Ómirjan Kópbosynovqa berildi (árqaısysyna 300 myń teńgeden) berildi.

Qazylar alqasy osyndaı sheshim shyǵaryp, júldegerlerdi marapattaý rásimi barysynda bas júldeniń berilýine Respýblıka saraıyna lyqa tolǵan halyq narazy boldy. Orazaly Dosbosynovtyń tól shákirti, iri izi Bolatbek Orazbaev sheshýshi aıtysta jyraýlardaı jyr tókti. Degenmen ádil qazylar bergen baǵada «bir toǵyz» berilip, «Altyn dombyra» qarsylasy Muhtar Nıazovqa berildi.

Muhamedjan Tazabek, Amanjol Áltaev, Dáýletkereı Kápuly, Baýyrjan Halıolla, Ádilbek Ybyraıymuly, Qonysbaı Ábilov, Qoılybaı Asanov sıaqty «zeınettegi aqyndar» qazylyq etken aıtystyń aqtyq básekesine Bolatbek Orazbaev pen Serikzat Dúısenǵazy, Muhtar Nıazov pen Jansaıa Mýsına "Altyn dombyra" úshin aıqasqa shyqty.

Júlde tapsyrýda sóz alǵan Almaty ákimi Baýyrjan Qydyrǵalıuly sózin halyqqa qarata «Sabyr etińiz!» dep bastady. Baýyrjan Baıbek aqyndarǵa rızalyǵyn aıta kelip, Bas báıgeniń júldesine taǵy 2 000 000 teńge, birinshi orynnyń júldesine 1 000 000 teńge ústeme qosatynyn habarlaǵanda kórermen qoshameti tipti de údeı tústi. Shýlaǵan halyqqa Bolatbek Orazbaıulynyń ózi basý aıtyp: "Halyqtyń birligi maǵan myń artyq" dedi.

Aıta keteıik, «Altyn dombyra» aıtysy osymen V ret ótkizilip otyr. Muhtar Nıazov (2012 jyly) alǵashqy ıegeri bolǵan edi. 2013 jyly Jandarbek Bulǵaqov ıelense, 2014 jyly Balǵynbek Imashevtiń enshisine buıyrǵan bolatyn. Al 2015 jyly «Altyn dombyra»  Aspanbek Shuǵataevqa buıyrdy. Ár joly «Altyn dombyra» aıtysy ótken saıyn arty belgili dárejede daýǵa ulasyp keledi.

Erlan Tóleýbaı