Qazaqstannyń Soltústik oblysynda qala men kóshe ataýlaryn qazaqshalaýǵa qarsy shyqqan azamat sottalýda, dep habarlaıdy «31 arna». «Qazaqstannyń qalalary men kóshe ataýlaryn qazaqshaǵa ózgertetin bolsa referendým ótkizemiz» dep lepirgen Petropavl turǵynynyń ústinen qylmystyq is qozǵalypty. Petropavldyń 37 jastaǵy turǵyny Igor Chýprın. Ol QR Qylmystyq kodeksiniń 174 baby, «Ultaralyq arazdyqty qozdyrý» boıynsha aıyptalǵan. Áleýmettik jeli arqyly Ultaralyq jáne dinaralyq arazdyq týdyrtyp, separatıstik bastamalar kótergeni úshin endi ol zań aldynda jaýap beretin bolady. Sotta aıtylǵandaı 37 jastaǵy Igor Chýprın 2014 jáne 2015 jyldary óziniń «Bkontakte» áleýmettik paraqshasynda halyq arasyndaǵy alaýyzdyqty týdyratyn jazbalardy únemi úzdiksiz jarıalap otyrǵan. Ásirese, Petropavldaǵy aýyldar men kóshe ataýlarynyń qazaq tiline ózgerýine qarsy bolyp, «Vkontakte» paraqshasynda ózine jaqtastar izdegen. Atalmysh jazbalar kóptegen jeli qoldanýshylarynyń narazylyǵyn týdyrǵan. – Meniń «Oıanyńdar, referendým» degeni qatty janyma batty. Men buny ózime ulttyq qaýip retinde qabyldadym, dedi kýágerlerdiń biri Danıar Ábjikeev. Qazir Qazaqstannyń birneshe aımaǵynda kóshe ataýlaryn qazaqylandyrý jumystary júrgizilip jatqany belgili. Aıdyń basynda Astanadaǵy birsypyra ataýlar ózgergen bolatyn. Al kúni keshe ǵana Almatydaǵy jeti kósheniń atyn ózgertý týraly sheshimdi qala basshysy Baýyrjan Baıbek shyǵarǵan-tyn.