Aqtóbe oblysynda erli-zaıyptylar 8 jyldan beri KSRO qujatymen júr. Olar táýelsizdiktiń 25 jyldyǵy qarsańynda Qazaqstan azamatynyń jeke kýáligin alýdy armandaıdy dep habarlaıdy "Kerek info".

Jádiger Ermatov pen Maıra Qanjanova qazir Yrǵyz aýdany, Qyzyljar aýylynda turady. Olardyń Reseıden Aqtóbe oblysyna kóship kelgenderine 8 jyl bolǵan. Alaıda 54 jastaǵy erli-zaıyptylardyń áli kúnge deıin qujaty, jeke kýálikteri bolmaǵandyqtan, memleketten beriletin kómekten de qaǵylyp keledi. Týystarynyń jaǵdaıyna alańdaǵan baýyry Talǵat Ermatov "Kerek info" gazetine kelip, shaǵymyn aıtty.

"Aǵam men jeńgem Yrǵyz aýdanynda týyp-ósken. Balalary da osynda dúnıege keldi. Alaıda 1995 jyly Reseıge kóship ketken. El táýelsizdikti endi alyp, aqsha qunsyzdanyp jatqan kez ǵoı. "Jurttyń bári joqshylyq keldi" dep úreılenip júrdi. Kúnkóris úshin olar da Orynbor oblysynyń bir aýylynda turatyn týystarymyzdy saǵalaýǵa májbúr bolǵan. 2008 jyly qaıtadan Yrǵyz aýdanyna kóship keldi. Biraq, áli kúnge deıin ekeýinde de Qazaqstan", - deıdi ol.

Búginde aǵa-jeńgesiniń qujattarymen ár mekemeniń tabaldyryǵyn tozdyryp júrgen Talǵat Ermatov búrokratıalyq áýre-sarsańnyń kóp ekenin de jasyrmaıdy. Tólqujat álegimen bıyl Oraldaǵy Reseı konsýldyǵyna da baryp qaıtqan. Alaıda áli kúnge deıin eshqandaı nátıje joq.

"Jeke kýálikteri bolmaǵandyqtan, tegin medısınalyq kómek te ala almaıdy. Turaqty jumystary da joq. Aqshadan qınalǵan sátte, tipti nesıe de ala almaıdy. Qujaty bolmaǵan soń zeınetaqy qoryna da aqsha túspeıdi. Zeınetke shyǵýlaryna sanaýly jyldar qaldy. Olar endi qolymyzǵa jeke kýálik alsaq dep armandaıdy", - deıdi Talǵat Ermatov.

Aqtóbe oblystyq İİD-niń basshylyǵy da bul azamattardyń áli kúnge deıin qujatsyz júrgendigin rastady. Polısıa polkovnıgi Qanybek Jaqsyǵalıevtiń sózinshe, erli-zaıyptylar buǵan deıin qoldaryndaǵy merzimi ótken, azamattyǵy joq tulǵa men shetel azamatyna berilgen yqtıar hattardy kórsetpegen. Sol sebepti olardyń ótinishi qanaǵattandyrylmaı kelipti.

"Qazirgi tańda olarǵa Oral qalasyndaǵy Reseı Federasıasynyń elshiligine baryp, qujattaryn qaıta rásimdeý týraly keńes berildi. Keıin ótinishteri qaıta qabyldanyp, olarǵa tólqujattaryn rásimdeý bo-ıynsha tıisti sharalar alynady", - deıdi Qanybek Jaqsyǵalıev.

İİD-niń málimetinshe, jyl basynan beri keńestik kezdegi tólqujatpen júrgen 175 adamǵa jeke kýálik berilgen. Qazir kóshi-qon polısıasy basqarmasynda áli 24 aqtóbeliktiń ótinishi qaralyp jatqan kórinedi.