«Túrkmenstanda saqal-murtty alǵyzyp, Qurandy tartyp alyp jatyr» degen ataýmen «Islam daýysy» reseılik saıtynda paıda boldy. Din men dil jaǵdaıyna beıjaı qaramaıtyn bizdiń saıt materıaldy qazaqshaǵa aýdaryp, oqyrman nazaryna usynýdy jón sanady.

Azattyq Radıosynyń bergen málimetine sáıkes Túrkmenstandaǵy namaz oqıtyn, saqal-murt ósirgen musylmandarǵa qysym jasalýda.

Qýǵynǵa ushyraǵandardyń bireýi Túrkıaǵa qonys aýdarýǵa májbúr bolǵan. Ony namaz oqyǵandyǵy úshin memlekettik qyzmetten bosatqan. Jumystaǵy óz mindetin atqara otyryp ol namazyn da qaza qylmaǵan. Bastyǵy namaz oqýdy doǵarýdy buıyrǵan. Aqyr sońynda jumystan shyqqan keıipker memlekettik qaýipsizdik qyzmetkerleri tarapynan qysymdy sezine bergen. Tergeý barysynda oǵan dinı toptarmen qarym-qatynasy, qolda bar Islam ádebıeti jaıly suraqtardy qoıa berýden sharshamaǵan. Tipti Quran kitabyn tartyp alypty.

Ekinshi oqıǵaǵa kezek bersek. Birshama ýaqyt shetelde bolǵan bir musylman Otanyna, óziniń eldi-mekenine oralǵan bette jergilikti áleýetti qurylymdardyń qyzyǵýshylyǵyna ilingen. Olar oǵan saqal-murtty alyp tastaýǵa aqyl-keńes bergen. Nátıjesinde boı bermegen, tildi almaǵan musylmannyń saqal-murtyn áleýetti qurylymdar ózderi alyp tastaıdy. Sonymen qatar baıǵusty dinı estremızmge baılanysty kúdiktilerdiń tizimine engizip tastaǵan. «Maǵan bul jerde tynyshtyq bolmaıtynyn túsindim. Sol sebepti Túrkmenstannan kettim. Oralatyn oıym da joq»,-deıdi ábden zárazap bolǵan musylman.

Azattyq Radıosynyń habarlaýynsha Túrksmentannyń Dashoǵuz aımaǵynda jaǵdaı tipten qıyn. İs-áreketi, júrgen júrisi sál de bolsyn jurttan ózgerek bolsa ondaı adam áleýetti qurylymdardyń nazaryna iligedi.  Sóıtip olardyń turǵan jerlerine kelip, Qurandy jáne basqa da dinı kitaptardy tárkileıdi eken.

Aýdarǵan: Jazıra Baıdaly