Táýelsizdiktiń 25 jyldyǵyna jáne Ulttyq valúta kúnine oraı Tuńǵysh Prezıdent kúni qarsańynda aınalymǵa Elbasy N. Nazarbaevtyń sýreti basylǵan 10 myń teńgelik banknotalar aınalymǵa shyǵatyny habarlanǵan bolatyn.

Al, 12 jeltoqsannan bastap atalǵan banknotalar Ulttyq banktiń fılıaldary arqyly taratyla bastady. Bar-joǵy 100 myń danamen shyǵarylǵan jańa banknotany alamyn deýshilerdiń sany da az emes sıaqty. Onyń ústine Ulttyq bank prezıdent beınesi basylǵan jańa aqsha ár adamǵa tek bir danadan ǵana beriletinin, saılaýlardaǵydaı «karýsel» jasap, bir adamnyń birneshe qundy qaǵaz ıelenýine jol berilmeıtinin de qatań eskertken. Sondyqtan da, Nazarbaevtyń portreti basylǵan banknotany ustaý – ekiniń birine buıyra bermeıtin baq.

Jańa on myń teńgelikke qol jetkizgender túske taman ol qýanyshtarymen túrli áleýmettik jeliler men forýmdarda bólise bastaǵan. Al, «Ratel» saıty bolsa atalǵan banknotany ınternet pen áleýmettik jeli arqyly saýdaǵa shyǵarǵandardyń da bar ekenin jazady. Osylaısha, adamdardyń patrıottyq sezimi men prezıdentke degen mahabbatynan da paıda tabýdy jón sanaǵandar da joq emes. Shamasy olar jańa aqshany Ulttyq bank fılıalyna baryp alǵannan, ınternet arqyly satyp alýdy jeńil sanaıtyndardyń kóp bolaryna senimdi sıaqty. Sondyqtan da, jarty kún ishinde satylatyn 10 myń teńgelikterge batyl baǵalar baǵamy boı túzepti. Áleýmettik jeliler men ınternet-dúkenderde ol ár danasy úshin 15 myńnan 50 myń teńgege deıin saýdalanýda.

Alaıda, kolleksıonerler úshin 100 myń dana taralymnyń da az emestigin eskergen jón.

Basylym osy oraıda taǵy bir shıkiliktiń shetin shyǵaryp otyr. Jańa banknotanyń tusaýkeserinde Ulttyq bank tóraǵasy Danıar Aqyshev tanystyrǵan banknotalardyń serıasy QAZ degen áripterden quralsa, myna aınalymdaǵylarynyń serıasynda AA áripteri tańbalanǵan. Sondaı-aq, banknotanyń resmı habarlanǵandaı Almatydaǵy banknota fabrıkasynda emes, Qazaqstannan tys jerde, De La Rue kompanıayna qarasty fabrıkalardyń birinde basylǵany aıtylýda.