«Jeltoqsan 86-9»
Ashtyq jarıalaǵandardyń talaptary
1994 jyldyń kóktemi. Qysqy azyǵyńdy kóktemnen jına degen naqyldy ustanǵan áıelim - Roza ekeýmiz «vremánkamyzdyń» aldynda jer qoparyp, baqshamyzben aınalysyp jatqanbyz. Kópten úıimizge qonaqqa kelmeı ketken Qadyr men Jambyl erteń eski alańnyń aldynda ótkizilgeli jatqan mıtıń jaıyn aıta kelipti. Uıymdastyrýshylary kim degenime, barlyq uıymdar bolady, bizdiń jigitter byltyr qurylǵan jańa komısıanyń jumystaryna kóńilderi tolmaıtyndaryn aıtyp, birazy ashtyq jarıalaıtyndaryn málimdeıtin kórinedi. Jerge qatysty máseleler kóterilip jatqanǵa da uqsaıdy. Men erteń sol jerde kezdesetinimizdi aıtyp, qonaqtarymdy shyǵaryp saldym. Ertesinde on kezderinde alańǵa kelsem, myń jarymdaı adam jınalyp qalǵan eken. Syrtty ala, perımetrmen mılısıonerlerdiń de qaptap júrgenderin baıqadym. Jıyn bir saǵattan astam ýaqyt boldy. Mıtıń uıymdastyrýshylary Abraev pen Nálibaev osymen jıynymyz, mıtıńimiz bitti degeni sol edi, daıyn turǵan mılısıonerler men OMON jurtty jappaı avtobýstarǵa tyqpalaı bastady. Eki-úsh avtobýsqa jıylǵan sherýshilerdi «Selınnyı» kınoteatry janyndaǵy mılısıa bólimshesiniń joǵarǵy qabattaǵy zalyna kirgizip jatyr. Mılısıanyń basshysy qorqyta, úrkite sóılep, ákimshilik quqyq boıynsha birtalaı baptardyń buzylǵanyna baılanysty jaýapkershilikke tartylatyndyǵymyzdy jaıyp saldy. Bundaıdy kútpese kerek, jasy úlkenderdiń bireýiniń júıkesi syr berip, biriniń qan qysymy kóterilip, biri esterinen tanyp jatty.
Jeltoqsandyqtardyń ishinde Amanjoldyń (sol kezdegi tóraǵamyz) bolmaǵany tań qaldyrdy. Qalaıda shyǵyp ketýdiń joldaryn oılastyra bastaǵanym sol edi, «Myna jerde ashtyq jarıalaý týraly ótinish jazbaǵandar bar ma?» - degenin paıdalana, men ornymnan turyp, ótinish jazbaǵanymdy aıttym. Onda bossyń dep qoıa bergeni. Shyǵa salysymen, birden «Demokratıa úıine» tarttym. Kabınettiń esigi ashyq, Amanjoldyń qara dıplomaty tereze aldynda jatyr, ózi joq. Biraz kútip otyrdym. Kelmegen soń dıplomatty qolyma alyp qarasam, aýzy ashyq eken, «Jeltoqsan» qoǵamdyq birlestiginiń móri de ishinde. Bir jaǵdaıdyń bolǵany anyq, onyń qalaı órbigeni jaıyn bilý men úshin ázirge jumbaq bolatyn. Dereý jan –jaqqa telefon shalyp, jigitterdi jınaı bastadym. Aldymen, Esimbaev Qadyr men Mýzafarov Álibek kelip jetti. Bolǵan jaǵdaımen olardy tanystyryp, jedel basqarýshy top quryp, ony úsheýmiz basqaratyn bolyp kelistik. Mór men dıplomatqa Álibek jaýap beretin boldy. Amanjol iz túzsiz joq bolyp ketti.
Jer jerdegi jeltoqsandyqtarǵa úshbý habar taratylyp, «Demokratıa úıine» tez arada jınalý kerektigi jetkizildi. Sol kezdegi jeltoqsandyqtardyń aýyzbirshiligi men ózara qarym-qatynastary joǵarǵy deńgeıde bolatyn. Ertesinde-aq jıyrmadaı jeltoqsandyqtardyń basy qosyldy. Keshegi ótken mıtıńiniń mánisi talqylanyp, birine aıyppul, on, on bes kúnge qamalǵan Qarabaev Shora, Taıjumaev Jambyl, Dáýletov Jeńister jaıynda sóz bolyp, oǵan «aıaq» jasap, habarlaryn alyp kelý Qadyrǵa júktelip, ol «Lobachevskııdegi bıch.prıemnıkke» birden attanyp ketti. Quzyrly oryndarǵa arnaıy hat-habar, talap pen tilekterdi jetkizýdi men moınyma aldym. Ýaqytsha «Jeltoqsan» qoǵamdyq birlestigin basqarý Qadyr, Álibek ýsheýmizge júkteldi. Týske jetpeı Qadyr qamaýda jatqan jigittermen «aıaq» ornatyp, qal-jaǵdaılaryn, «ksıvalaryn» alyp kelipti. Oqyp, tanysqannan keıin, «ashtyq» aksıalaryn sol jerde jalǵastyryp jatqan jigitterdi shyǵaryp alý úshin, olardy qoldaý aksıasy «Demokratıa úıiniń» ishinde jalǵasatyn bolyp sheshildi. Jigitterdiń ishinen sol kúni densaýlyqtary men jaǵdaılaryna baılanysty tórt jigit – Meıirbek Erkinbek, Otarbaev Kenje, Esbosynov Amanqos jáne jeltoqsanǵa kýıeý bala bolyp keletin jezqazǵandyq Baýyrjan (Serkenova Anardyń joldasy) ashtyq aksıasyn bastaıtyn boldy. Janymyzdaǵy «Nıkolskıı» bazarynan bazarlyq alyp kelip dastarhan jaıylyp, «bir atanyń balalaryndaı»- jeltoqsandyqtar bir-birimizge sóz berisip, jeńisti kúnge deıin biraýyzdy bolatynymyz shegelendi. Táńirim osy bazarda kezinde bir kýrsta oqyǵan «mestnyı» Elýbaev Erbol baýyrymdy kezdestirip, birtalaı kómegi tıdi. Bir jarym aı boıy ishetin, jeıtin tamaq pen taǵamdardy sodan alyp ketip turatyn boldym. Alla razy bolsyn! Keshkisin «jatyn oryndar» jetkizilip, ashtyqtaǵylardyń qasynda bolatyn kezekshilikti Qadyr atqaratyn bolyp, úıdi úıimizge tarqastyq.
Kelesi kúni men, sodan keıin Álibek táýlik boıy kezekshilikti, barlyq jaýapkershilikti úsheýmiz kezektesip atqaratyn boldyq. Ertesinde quzyrly oryndarǵa talap pen tilekterimiz jazylǵan hattar jetkizilip jatty. Arnaıy Almaty qalasyndaǵy «qyzyl kres» uıymyna jazylǵan hatty tabystaý Álibekke júkteldi. «Basshysymen famılıalaryń bir eken, týysyńdy osy ýaqytqa deıin nege jasyryp kelgensiń»,- dep qaljyńdap qoıýdy da umytpadym. Túske jetpeı qalanyń ishki saıasat bóliminen, medısına ortalyǵynan dárigerler de kelip jetti. Dárigerler Kenje men Amanqosqa ashtyqty jalǵastyrý aǵzalaryna óte zıan bolatynyn taǵy da eskertti. Amanqostyń túrmeden keıin asqazany, Kenjeniń ókpesi aýyratyn. Olar ashtyqty óz erikterimen jáne qoıylǵan talaptar oryndalmaıynsha jalǵastyratyndaryn taǵy qaıtalady. Dál osy kezde ashtyq jarıalaý týraly ótinishteri men talap-tilekterin jetkizip, dárigerlerge «aldyn ala» tekserilip, Qasenov Rústembek pen Ramazanov Amandyq aksıaǵa qosyldy. Kelesi kúni shymkenttik Isabekov Sábıt kep ashtyqqa kirdi. Bir jetiden keıin jedeljárdem kóligi alyp ketip, bir aı emhananyń tósegine baılandy. Ashtyqtyń ishinde, eshqandaı nár tartpaı, tek qana sý ishýge bolatyn túrine toqtaǵan edik. Sóıtip, ishte úsheýi, syrtta altaýy bastaǵan jeltoqsandyqtardyń ashtyq aksıasy bastalyp ketken edi. Qala ómirinde bundaı áreketterdi kórmegen ákimshilik pen ártúrli quzyrly oryndar, eriksiz bizdermen, qoıǵan talaptarymyzben tanysýlaryna, keıinnen sanasýlaryna týra keldi.
Úshinshi kúni Joǵarǵy Keńestiń depýtaty - Jasaral Qýanyshálın aǵamyz, Aısulý Qadyrbaeva apaıymyz bastaǵan «Azat» qozǵalysynyń azamattary ashtyq jarıalap jatqan jeltoqsandyqtardyń qal-jaǵdaılary men talap tilekterimen tanysyp, aksıany Seıttaı Ádenov aqsaqalymyz qoldaıtynyn bildirip, jaqyn arada qosylatynyn aıtty. «Demokrattar úıinde» ornalasqan ártúrli memlekettik emes qoǵamdyq uıymdarmen, túrli dıasporalardyń mádenı-ortalyqtarynyń jetekshileri de qulaqtanyp, túsinistikpen qaraıtyndaryn bildirip jatty. Barlyq jeltoqsandyqtarǵa úndeý tastalyp, jer-jerdegi jigit pen qyzdarymyzǵa habar jiberdik. Bir de bireýiniń qalmaı qatysýyna, bolmasa, qarjylaı qoldaýlaryn kórsetýdi suradyq. Qyzdarymyz: Klara, Gúlnár Abylqaıyrova, Gýlvıra Panınova, Qaıypqan Imanbaeva, Espembetova Qanshaıymdar qoldap, jigitterimiz: Imanbaev Ermek, Jumajanov Erikjan , Ótkirhan Múlkibaev, Hasen aǵamyz, Túgelbaı Táshenov, Qaıyrgeldi Kúzembaev, Rýzıev Abaıdýlla,Ábdireev Elaman, Shynybaev Nurmandar qomaqty úlesterin qosty. Kezinde Dinmuhambet Ahmetuly Qonaevtyń «soprovojdenıesiniń» basshysy bolyp, sottalyp, keıinnen tolyq aqtalǵan – Myrza Ilıch Akýev aǵamyz da óziniń úlesin tastap ketken edi. Tipti, Muhtar aǵamyzdyń «hatshysy» Láılim jumystan keıin dos qyzdarymen kelip, ashtyqta jatqan jigitterimizdiń kóńilderin kóterip rýh berip ketetin. Keıinnen bizderge nıettes Nesipkúl de ashtyqqa otyrdy. Bundaı «jalpyjeltoqsandyq» aksıa buryn sońdy bolmaǵan edi. Tórtinshi kúni jigitterimizdiń shyǵaratynyn estip, qajetti qamǵa kirisip kettik. Olardy qarsy alyp, monshalaryna aparyp, bir qabat kıimderin jańartý, ana jaqtan qalyp qoıǵan «jazylmaǵan» zańdylyǵymyzdy da abyroımen atqaryp kelgennen keıin, Taıjumaev Jambyl osyndaǵy aksıany jalǵastyratynyn bolyp, jigittermen qalyp qoıdy. Otarbaev Kenje men Esbosynov Amanqosty dárigerler densaýlyqtaryna baılanysty «gospıtalızasıaǵa» alyp ketti. Olardyń ornyn Shabarov Altaı, Ábdiqadyrov Berikbol men Nesipkúl qaryndasymyz almastyrdy. «Gospıtalızasıaǵa» ketip jatqan jigitterimizdiń ornyn jańadan jigitterimiz basyp, keıinnen Seıittaı aǵamyz qosylyp, jalpy ashtyq aksıasy qyryq bes kúnge sozyldy.
Bılik qoıǵan talaptarymyzdyń oryndy ekenin moıyndap, sol jyly qalalyq ákimshilikten on páter bólinetinin, keıinnen, ár deńgeıdegi basshylar qoıylǵan talaptardyń oryndalatynyna ýádelerin úıip-tógip berip jatty. Ashtyqtyń sońǵy kúnderinde Rasylhan men Amanjol da qosylǵan edi. Sóıtip, biz ashtyqty toqtattyq. Ashtyq barysynda adam aǵzasynyń keremet qasıetterine tańqalmasqa sharam qalmap edi. Olaı deıtinim, alǵashqy kúnnen ashtyqqa dóńgelektenip kirgen Meıirbek Erkinbegimiz, aıaǵynda, jiptikteı áp-ádemi bolyp shyǵa kelgenin kórgende, barshamyz rıza bolyp qolyn alǵan edik. Tipti, jasaryp ketkendeı bolyp ta kóringen edi. Eń bastysy: túrme men etaptarda kórgen qıyndyqtar men densaýlyqtarynyń jaǵdaılary; úı-ishi otbasy jaǵdaılarynda bolyp jatqan ártúrli qıyndyqtar men kıkiljińderge qaramastan; alańda ar men namysty bıik kótergen azamattarymyzdyń beıbit ómirde de, azamattyq qoǵam qalyptastyrý jolynda erlik pen birliktiń ólsheýsiz úlgisin kórsetkenderin áli kúnge deıin maqtan tutamyn. «Bir atanyń balalaryndaı» bolyp kerinetin, sol kezdegi «jeltoqsandyq birlik pen birizdilikti» janymnan tappaı qalǵan kezderimde, keıinnen, úı ishinen qos tikken jeltoqsandyq uıymdardyń basshylary bir birimen bolmashy dúnıelerge bola «yryldasyp» jatqandaryn estip qalǵan kezderimde, kók bórideı Aıǵa qarap ulyp qoıa bergim kelip ketedi.
Jarqyn betburysymyzdyń joıqyn betashary, Qazaqstannyń táýelsizdigi úshin, qazaq ultynyń gúldenýi úshin, onyń tarıhy men mádenıetiniń barynsha órken jaıýy úshin tún uıqysyn tórt bólgen azamattardyń barlyǵyna da asa qymbat, asa qasıetti – «Jeltoqsan 86» men jeltoqsandyqtardyń ómir belesindegi ashtyq aksıasy osylaı aıaqtalǵan bolatyn.
Zamanbek jaıly jazbadan
Aldyǵa qoıylǵan jumys josparyna saı, talap tilekterimizdi jetkizý maqsatymen Almaty qalasynyń sol kezdegi ákimi Zamanbek Qalabaıuly Nurqadilovtyń qabyldaýyna bara jatyrmyz. Demokratıa ýıinen shyǵyp, kýndelikti ádetimizben "11 marshrýt", tikeleı tarttyq. Qasymda jeltoqsannyń abyroıly azamattary semeılik - Qadyr Esimbaev jáne jambyldyq - Jambyl Taıjumaev. Á degenshe, qajetti jerimizge jeldeı esip jetip keldik. Kire beristegi mılısıoner jigitine qujattarymyzdy kórsetip, ekinshi qabattaǵy qabyldaý bólmesine kóterildik. Hatshy da kelgenimizdi kórip, irkilmesten , bizderdi ózi bastap alyp kirdi. Jeltoqsan qoǵamdyq birlestiginiń tóraǵalyq qyzmetin atqarǵan alǵashqy jyldarym. Alyp deneli aǵamyzdyń ornynan atyp turyp, aldymyzdan shyǵyp,"assalaýmaǵaleıkým" dep usynǵan qoldarymyzdy alyp, oń jaqtaǵy ýlken dóńgelek stolǵa bastap baryp, tórge jaıǵasty da, jaǵalaı otyrýymyzdy surady. Kabınettiń oń jaǵynda dóńgelek stól biz sıaqty qazaqtarmen áńgimelesýge ádeıi arnalǵandaı eken. Ortadaǵy uzynnan uzyn stól ákimshiliktiń ózderine qatysty jıyndaryna arnalǵandaı. Eń joǵaryda aǵamyzdyń telefondarǵa toly jumys stoly jaıǵasypty.
Janymdaǵy jigitterdi tanystyryp bolyp, qara papkamdaǵy qajetti qujattarymdy shyǵara bastaǵanym sol edi, telefon tutqasyn alyp, orynbasarlarynyń birin shaqyrtty. Esikten sálem berip suńǵaq boıly qolynda qalam - qaǵazy bar Vıktor Vácheslavovıch Hrapýnov endi. Áńgime jelisin byltyr ǵana qolymyz jetken Prezıdent jarlyǵyna baılanysty shyqqan, Premer-mınıstrdiń Ókimi, qurylǵan arnaıy komısıa músheleriniń jumysy jaıyna burdym. Kórsetilgen, oryndalýǵa tıisti jerlerine toqtalyp, orynbasaryna qajetti nusqaýlar berip, kóterilgen suraqtarymyzǵa tolyqtaı jaýabyn berip kóńilimizdi bir masaıratyp salmasy bar ma, aǵamyzdyń.
Aıta ketetin jaıt, bir saǵattaı ózara áńgimemiz tek qana qazaq tilinde órbidi, qulaǵy tesik orynbasary tikesinen tik turyp, bastyǵynyń da, bizdiń de kóńilimizden shyqty. Orynbasaryna tapsyrmalaryn berip, shyǵaryp salysymen, bizderge qarap,"...
- Áı, jigitter erlikterińe rahmet, maǵan salsa barlyq jumystaryńdy, az ýaqytta sheship berer edim, átteń, barlyq bılik "qonjyqtyń" qolynda, soǵan qaratyp qoıdy ǵoı" degeni. Kim jaıynda meńzep otyrǵanymdy sezip otyrǵan shyǵarsyńdar, - dep qaıyrdy. Iá, onysy Tereshenko ekeni beseneden belgili edi.
Jalpy jaǵdaılarymyzdyń anyq qanyǵyna qanyp, birtúrli tunjyrap qalǵandyǵyn baıqap, áńgimeni jeńil jaqqa bura bastaǵanym sol edi, Jambyl, óziniń aqtala almaı júrgendigin aıtyp, "týpıkovoe polojenıe", - dep qalmasy bar ma. Ornynan atyp turyp, "jigitter, týpıkovoe polojenıe ý ne byvaet",- dep, tór jaqtaǵy telefondarǵa toly óz ornyna jyldam basyp baryp, tutqasyn qolyna alyp, bireýdi tere bastady. Birdeńeni búldirip alǵandaı, jigitter bir birimizge qarap qalyppyz. Qysqasha amandasyp, anaý komısıa músheleriniń buryshyna meniń famılıamdy ilipti, jigitter áli kúnge aqtalmaı júr eken, tezirek aqtasańdarshy!, - dep telefonnyń qulaqshasyn qoıa salǵany... Keıinnen ańǵarǵanym, Sol kezde Joǵarǵy Sottyń tóraǵasy Aıtmuhambetovqa habarlasqan eken. Al, jigitter áńgime bitse, osymen amandyqta bolaıyq,- dep qolyn usynyp, nyq basyp kele jatty. Rızashylyq pen rahmetimizdi jamyra aıtyp, biz de aǵamyzdyń qabyldaýynan shyǵyp kele jattyq. Rasymen, kóp ýaqyt ótpesten bizdiń jigitter "pachka-pachkasymen" aqtala bastady. Komısıaǵa jan bitip, sol jyly jigitterimizdiń densaýlyqtaryn Almaty qalasyndaǵy "dıagnostıkalyq" ortalyqta tolyqtaı, aqysyz tekserip alýǵa múmkindik jasalyndy. Marqum Qaırattyń anasy - Dámetken apamyzǵa, Shora Qarabaevqa, Qasym baýyrymyzdyń apaıy - Gúlnár Ábilqaıyrovaǵa (bir ýıden eki adam sottalǵan) jalpy jınalystyń sheshimimen páter kiltin tabystaýǵa múmkindik týdy.
Bul bizdiń "Jeltoqsan" qoǵamdyq birlestiginiń kelesi bir jeńisti, jemisti jyldary edi.
Prezıdenttik doda
Jeltoqsan 86-2011
Osydan dál 4 jyl buryn, 2011 jylǵy Prezıdenttik saılaýǵa (dodaǵa) túsken 22 azamattyń qatarynda - 3 partıa tarapynan, 18 - jeke azamattar jáne jalǵyz qoǵamdyq birlestikter atynan - Jeltoqsan týyn kóterip, keshkisin astanalyq jeltoqsandyqtar - Toqtar, Marat, baýyrlarym - Sálim, Erzattardy ertip QR OSK ǵımaratyna bet aldym.
Respýblıkalyq "Jeltoqsan" halyqtyq-patrıottyq qozǵalysynyń atynan usynǵan qujattarymdy muqıat qabyldap jatqan OSK orynbasary V.K. Foostyń is-qımyly men sóılegen sózderinen abyrjyǵandyq, sál qobaljyǵandyq izderin baıqap qaldym. Telefonynda damyl joq, qoldaý kórsetken uıymdardyń mórlerine qaıta-qaıta úńilýmen boldy. Birtalaı ýaqytqa sozylǵan bul kórinistiń ústine entigip jetken sporttyq kıimdegi aqsaqalmen amandasqanymyzdan keıin, keńsesine birge júrýimdi surady, áp degennen dókeıdiń ózi ekenin ańǵardym. Qabyldaýdyń sońǵy kúni men sátterinde paıda bolǵandyǵym ba, álde qasıetti jeltoqsannyń sharapaty ma, kire beristegi mılısıonerlermen qatar sol ǵımaratta qyzmet jasap jatqandardyń birtalaıyn ábigerge salyp qoıǵan sıaqtymyn, QR OSK tóraǵasy - Q.T. Turǵanqulovtyń keńsesindegi jeke áńgimelesýimizden keıingi oılarymnan túıgenim. Áńgime sońyna taman engen OSK hatshysy B.S. Meldeshov myrza keńsesine ertip baryp saılaýǵa qatysty aqparattarmen tanystyra bastady. Qarapaıym qazaqılyqpen jón surasyp, jezdemdi de taýyp úlgerdim. Aldaǵy qazaq tilinen ótetin emtıhan eń sońǵy kúnge belgilenip qoıylǵanyn estigenimde, jezdeligin birden paıdalanyp, emtıhanǵa daıyn ekenimdi jetkizip, múmkinshilik bolsa, aldyńǵy kúnderge bolmas pa degen oılarymdy da tóge salǵanym.
Qujattarymnyń tirkelgeni boıyma erekshe kúsh bitirgendeı, Almatydaǵy jeltoqsandyqtarǵa da habarlasyp úlgerdim. Úıime qanat bitkendeı ásermen enip, teledıdardan Ǵanı Qasymov aǵamyzdyń tirkelip qana emes, qazaq tilinen emtıhandy tapsyryp úlgergeni jaıyndaǵy sújetti kórgenimde, jaǵamdy ustaǵan jaıymdy qalaısha jasyraıyn?!...
Túsime qazaq renesansynyń basy - Uly Abaı enip, birtúrli jaqsy ásermen turdym. Ózimshe joryp alǵannan keıin, úıden Abaıdyń qara sózderin izdep tapsamshy, onsyz emtıhan tapsyrýyma jol joq ekendigin topshylap ta qoıǵanmyn. Toqtardyń kitaphanasynan tabylǵan qos tildegi Abaıdyń qara sózderi meniń keıingi ómirime ózgeshe órnek salyp qana qoımaı, oı ıirimderine batyryp áketkendigi sonshalyqty, eki kúnniń qalaı ótip ketkenin baıqamaı da qalyppyn.
OSK hatshysymen habarlasyp, kelmeı qalýy múmkin degen úmitkerdiń ornyna ushyp jetip, kire beristen qarsy alǵan BAQ men jýrnalıserdiń saýaldaryna lám-mım demesten emtıhan alatyn zaldan biraq shyqqanym. Tipti, hatshynyń on mınýt buryn jolyǵyp ketýin ótingenin de esimnen shyǵaryp alyppyn. Dereý jınala bastaǵan komısıa músheleri aldyńǵy dóńgelek ústeldiń boıyna jaıǵasa bastady. Tór jaqtan enip kelgen Myrzataı Joldasbekov aǵamyzǵa "assalaýmaǵaleıkým", - dep amandasqanym esimde. Otyz jyl buryn tamamdaǵan mektep ordasymen, 17 jylda áreń qol jetkizgen - JOO dıplomynan keıin emtıhan tapsyryp otyrǵanym osy bolatyn. Erkin taqyrypty tańdap, sol kezdegi ultymnyń qol jetkizgen táýelsizdigi men erteńine baılanysty oılarymmen, tolǵanystarymdy jetkizýge kelgende qalamym ózinen ózi júıtkı jónelip, tipti, óleń shýmaqtarymmen aıaqtaǵan edim. Ol jaǵy jeke bir áńgimege arqaý...
Emtıhannan óte salysymen, jol jónekeı Qaraǵandydaǵy jigitterge toqtap, Saryarqamnyń saryshunaq aıazyna qaramastan, jeke kóligimmen Almatyǵa Sálim baýyrymyz ekeýimiz jetken de edik. Qarsy alǵan jeltoqsandyq baýyrlarymnyń ystyq qushaǵy men nıetteriniń keńdigi sonshalyqty, keńsemizge de sımaı qalǵandyǵyn qalaısha umytaıyn?!...
Ýaqyttyń azdyǵy, sol kezdegi aýa raıynyń jaǵdaıy men qarjynyń tapshylyǵy óz degenin jasady. Jazǵan hatyma habar bolmaǵan soń, bir jetige jeter jetpes ýaqytta 80 myń qoldaý jınap, ekinshi týrǵa ótýime 11 myńdaı qoldaý jetpeı qalǵanyn moıyndap, 2 naýryz kúni Astanada dodadan shyǵatynymdy QR OSK jetkizgen edim.
Doda barysynda qarjylaı, basqa da kómek kórsetpek bolǵan, keıinnen, sózderin jutyp qoıǵan "jigitter" jaıy jeke áńgime.
Al, jer-jerdegi qoldaý kórsetken halqyma, ásirese, óz qarjylaryna aýyldaryn aralap ketken jeltoqsandyq jigitter men qyzdarǵa alǵysym sheksiz!
Sońy.
