Mıralın, Aqsaqov, Chıkov jáne Sarambetov munaı ónimderin kelisilgen jerlerge úzdiksiz jetkizip otyrǵan. Munaı satýdan túsken qarajattyń bir bóligin uıymdasqan qylmystyq top músheleri arasynda úlestirilgen, al ekinshi bóligi zańsyz munaı ónimderiniń jańa partıasy satyp alýǵa jumsalǵan. İzbasar aqshanyń úlestirilýine jeke ózi baqylaý jasaǵan.
Osyǵan deıin munaı urlyǵy isi boıynsha 12 kúdiktini qamaýǵa alý týraly sheshim shyǵarǵan Aqtóbe qalalyq №2 sotynyń ókilderi "Aǵaıyndy tórteý" uıymdasqan qylmystyq tobynyń Erkin İzbasardyń jetekshiligimen "qara altyndy" qalaı urlaǵany jaıly málimet taratty dep habarlaıdy tengrinews.kz.
Tergeýdiń málimetinshe, qylmystyq toptyń músheleriniń biri - 30 jastaǵy Nurbolat Qaıyrbekov ótken jyldan bıylǵy sáýir aıyna deıin aýyldastary Aqsaqovty, Mıralındi, Sarambetovty, Chıkovty munaı ónimderin sáıkes qujatsyz zańsyz túrde tasymaldaýǵa qoldanǵan.
"Qylmystyq toptyń árbir múshesin Muhamedıanov, Sársenov jáne İzbasar baqylap otyrǵan. Barlyq másele İzbasarmen jeke kezdesýde sheshilgen, bul kezdesýler telefon arqyly shartty túrde kelisilip otyrǵan. İzbasardyń qurǵan qylmystyq tobynyń turaqty ári uzaqmerzimdi baılanysy bolǵan. Olarǵa Muhamedıanov, Sársenov jáne İzbasar baqylaý júrgizgen", - dep jazady basylym.
"İzbasardyń, Muhamedıanovtyń, Sársenovtiń jáne Qaıyrbaevtyń qylmystyq is-áreketteri memlekettik organdarda munaı ónimderin iri kólemde saqtaýǵa ruqsat beretin múmkindigi bar "Avtodor MK" JSHS, "Asad Plús" jáne "Tranzıt" janarmaı quıý beketiniń tirkelýine múmkinshilik jasaǵan.
Sýdıa uıymdasqan qylmystyq toptyń árbir múshesiniń róli qandaı bolǵanyn aıtyp berdi: "Sársenov pen Qaıyrbaev İzbasardyń basshylyǵymen munaı ónimderin zańsyz satýmen aınalysqan. İzbasar olarmen tasymaldaýǵa kólikti qamtamasyz etken. Munaı ónimderin tıeý, jetkizý jáne "Tranzıt" janarmaı beketine quıýdy baqylaǵan, júrgizýshiler Mıralın, Aqsaqov, Chıkov jáne Sarambetovterdiń jumysyn baqylaǵan, óz kezeginde olar tıisti jerge munaıdy jetkizip otyrǵan. Muhamedıanov pen belgisizder munaı ónimderin satý oryndaryn izdestirip, munaı ónimderin zańsyz qamtamasyz etip otyrǵan".
Sondaı-aq, is materıaldaryna qaraǵanda, Erkin İzbasar Aqtóbede Muhamedıanov pen Sársenov arqyly Qaıyrbaevqa munaı ónimderin rezervýar arqyly tıeý, jetkizý boıynsha naqty tapsyrmalar bergen, uıymdasqan toptyń jumysyn baqylaǵan. Jumystyń tártibi bylaı bolǵan: İzbasardyń tapsyrmasymen Sársenov, Qaıyrbaev jáne belgisizder munaı ónimderin zańsyz satyp alyp, olardy "Tranzıt" janarmaı quıý beketiniń rezervýary arqyly tasymaldaǵan, sol jaqtan reseılikterge satqan.
"Bıyl 1 sáýirde Muhamedıanov pen Sársenov reseıliktermen 97 myń lıtr munaı ónimin satýǵa kelisken, kelisim jalǵan qujatpen rásimdelgen. 2 sáýirde túnde avtosısterna Aqtóbeden Orsk qalasyna qaraı shyqqan. Kelesi kúni olardy polıseıler ustap alǵan. Olardan tabylǵan munaı ónimderiniń baǵasy 14 mıllıon 550 myń teńge bolǵan", - delingen habarlamada.
Sýdıa qylmystyq toptyń keıbir músheleri áli ustalmaǵanyn habarlady.
Al KTK telearnasynyń tilshilerine Aqtóbede Erkin İzbasardyń anasy ulynyń munaı urlamaq túgili, bıletke aqsha tappaı qınalyp ómir súrgenin aıtty.
Sonymen qatar, tilshilerdiń málimetinshe, Aqtóbede munaı urlyǵymen aınalysqan qylmystyq top músheleriniń arasynda kúsh qurylymdarynyń ókilderi bolǵan. Úsh kúnnen beri qamaýǵa sanksıa berip jatqan sot muny rastaǵanymen, naqty kimder ekenin ashyp aıtpaı otyr. Osy ýaqytqa deıin 12 kúdikti qamaýǵa alyndy. Aralarynda topty basqardy degen aıyp taǵylǵan atyshýly Erkin İzbasar da bar. Biraq advokaty men týystary onyń múgedektigin aıtyp, sot sanksıasyna narazylyq bildirýde.
Qamaýǵa alynǵandardyń arasynda"Aǵaıyndy tórte" degen laqap atpen tanymal uıymnyń serkesi - atyshýly Erkin İzbasar da bar. Al onyń quqyǵyn tanymaldyǵy odan kem emes - advokat Serik Sársenov qorǵap júr. Ol kezinde Arqankergende sarbazdardy qyryp tastaǵan Vladıslav Chelahtyń isimen tanylǵan edi. Bul joly qorǵaýshysyn aqtap alatyndyǵyna senimdi. Eń aldymen qamaýǵa alý týraly sanksıanyń kúshin joıýǵa kirispekshi. Óıtkeni arbaǵa tańylǵan, ári búıreginen aırylǵan múgedekke abaqtyda esh jaǵdaı jasalmaǵanyn aıtady.
"Birinshi toptaǵy, júre almaıtyn múgedek óz jaǵdaıyn abaqtyda jasaı almaıdy ǵoı. Onymen qosa búıreginiń joqtyǵynan únemi dárigerdiń baqylaýynda bolýy kerek. Sot ony qashyp ketedi dep qamaýǵa aldy.Sonda, arbada otyrǵan oǵan qanat bitip ushyp kete me?", - deıdi advokat Serik Sársenov.
Erkin İzbasardyń anasy ulynyń qylmysqa qatysy baryn estigende talyp qala jazdapty. Onyń kóldeneń tapqan tabysyn kórmedik dep tipti tań qalyp otyr. Óıtkeni, kúresten Almatyda ótetin chempıonatqa barýǵa qoradaǵy eki jylqysyn satyp, jolaqysyn taýyp berip edik degendi aıtady.
