Almatyda taǵy da alapat órt boldy. Kúndiz-túni qonaq arylmaı, táýlik boıy boıy jumys isteıtin "Aspandıar" asqanasy saý-tamtyǵy qalmaı otqa oranyp, artynsha jarylys boldy. Tótenshe jaǵdaı kezinde iri asqananyń ishi kelýshilerge lyq toly bolǵan dep habarlaıdy 31.kz
Úzilissiz qyzmet kórsetetin "Aspandıar" halal asqanasy áp-sátte qyzyl jalynnyń qursaýynda ketti. Ǵımarat aýmaǵy da kólemdi, birneshe bólikten turady. Jalpy kólemi 1700 sharshy metr. Kýágerlerdiń aıtýynsha, asqananyń as daıarlaý bólmesinde bir zat jarylyp, artynsha órt shyqqan. Osy sátte qonaqtar men qyzmetkerler japatarmaǵaı syrtqa umtylady.
MAQSAT, Kýáger:
- Barlyq halyq, tómen jaqta otyrǵandar kóshege shyǵyp, mashınalar, keptelis bolyp adamdar qaýmalap ketti. Sodan 2 mınýt ótpedi ǵoı deımin, taǵy da ot joǵary laýlady.
- 10 metrdeı júrsem, úıdiń tóbesinen ot laýlap jatty. İshten gaz balondaryn shyǵaryp jatyr.
Órt sóndirýshiler kelgen ýaqytta taǵy bir joıqyn jarylys bolady. Jalynmen otyzǵa jýyq tehnıka men 130-dan astam jeke quram sarbazy bir saǵat boıy alysty.
Qazir órt aýyzdyqtalǵanmen, mańaı qoıý tútinnen áli seıiler emes. Oqıǵa ornynda órt sóndirýshiler men birneshe tehnıka qyzý jumys júrgizip jatyr. Ǵımarattyń bir qaptalynda birneshe dóner, shaýrma satatyn dúńgirshekter de bolǵanyn baıqaýǵa bolady.
Qutqarýshylar asqana aýmaǵynan ottegi toltyrylǵan 4 balonmen birge 4 gaz balonyn alyp shyqqan. Tótenshe jaǵdaılar departamenti órt týraly habarlama der ýaqytynda túspegenin aıtady.
SANDÝǴASH BAIMUHAMBETOVA, Almaty q. TJD baspasóz qyzmetiniń jetekshisi:
- Órt sóndirý qyzmetkerleri shaqyrylǵan jerge kelgen kezde órttiń úlken aýmaqqa aýysyp, jáne de janynda ornalasqan jeke turǵyn úıler men úlken ǵımarattarǵa órttiń aýysý qaýpi boldy.
Órtten ázirge japa shekkender jaıly aqparat joq. Al bul jazǵy maýsym qarsańynda Almatyda bolǵan jalǵyz oqıǵa emes. Buǵan deıin "Iýbıleınyı" sýpermarketi, "Aragosta" túngi klýby tolyqtaı órtenip ketken edi. Almaty ákimi Baýyrjan Baıbek jazǵy kafe, asqanalarǵa baqylaýdy kúsheıtkenmen, qaladaǵy órt jaǵdaılary sıremeı otyr.
