Shardara maqtashylary bıyl mol ónim jınady, dep habarlaıdy oblys ákimdiginiń baspasóz qyzmeti. Aýdanda 12 291,2 gektar alqaptan mejelengen 33 309 tonnanyń ornyna 33 806 tonna shıtti maqta jınaldy.

Aýdan dıqandary qajyrly eńbektiń, agrotehnıkalyq talaptarǵa saı maqtany kútip-baptaý sharalaryn óz deńgeıinde atqarǵanynyń nátıjesinde joǵary kórsetkishke jetti.

Gektar ónimdiligin 27,5 sentnerden aınaldyrǵan dıqandar qaýymy osylaısha eren erliktiń úlgisin kórsetip otyr. Mol ónimge qol jetkizýde Q.Turysbekov, Kóksý jáne Alataý batyr aýyldyq okrýginiń maqtashylary súbeli úlesterin qosty. Sondaı-aq, Jaýshyqum aýylynda tamshylatyp sýarý ádisimen 240 gektarǵa maqta egip otyrǵan «Iirjar agro» JSHS-y da mol ónim alýǵa qol jetkizdi. Seriktestik dıqandary mejelengen 960 tonna shıtti maqtanyń ornyna 1224 tonna maqta alyp, ár gektardan ortasha 51 sentnerden ónim jınady.

Kóksý aýyldyq okrýgindegi «Toqaı» sharýashylyǵynyń tóraǵasy Asan Ádilbekov bıyl da gektar túsimin arttyryp otyr. Maıtalman maqtashynyń qaramaǵyndaǵy 9,5 gektar alqaptyń ár gektarynan 61,4 sentner ónim jınalǵan. Alataý batyr aýylyndaǵy Dúısen Lesov basshylyq jasaıtyn «Rahymjan» sharýa qojalyǵy 15 gektar maqtalyqtan 47 sentnerden ónim aınaldyrdy.

Jekelegen maqta terimshiler arasynda kóksýlyq Dúısenkúl Serkebaıǵa ilesetin adam bolǵan joq. Jıyn-terim naýqany bastalǵaly D.Serkebaı 20 gektar maqtalyqtyń ár gektarynan 61,2 sentnerden maqta terip, qyrmanǵa 123 tonna aq ulpa jınady.

Maqtashylardyń meje josparyn artyǵymen oryndaǵan kórsetkishi týraly aýdan ákimi Arman Abdýllaev oblys basshysy Janseıit Túımebaevqa arnaıy raport joldady. Qazirgi tańda aýyldyq okrýgterde maqta jınaý naýqany tolastaǵan joq. Sharýalar alqaptaǵy ónimdi jaýyn-shashynǵa uryndyrmaı jınap alý úshin ýaqytpen sanaspaı eńbek etýde.

http://www.zhebe.com/