«Orazadaǵy oıran» dep atalatyn týyndyda lańkesterdiń ózderi bolǵan oqıǵany búkpeı aıtyp beredi. Beıbit kúnde búlik shyǵarǵandar júzderin jasyrmaı, ókinishterin halyqqa jetkizýdi suraǵan eken. Sondyqtan ózgelerge sabaq bolar degen nıetpen fılmdi ázirleýge jergilikti bılik tapsyrys bergen. Ony ázirge jergilikti arnalar men arnaıy saıttar arqyly ǵana kórsetip jatyr dep habarlaıdy ktk.kz telearnasy.

Bul kórinistegi atys ortasynda qalǵan oıyn balasynyń daýsyn estigen jannyń denesi titirkenedi. Osydan-aq Aqtóbede jazda soıqan salǵan sodyrlardyń beıqam kóńildi balany da aıamaǵanyn baıqaımyz. Osy kúnge deıin esh jerde kórsetilmegen bul beınekadrlardy «Orazadaǵy oıran» atty derekti fılmde qoldanǵan. Jergilikti bılik pen quzyrly organdar týyndy arqyly maýsymdaǵy lańkestik oqıǵanyń qalaı bolǵanyn jáne basty keıipkerdiń kim ekenin ashyq jarıalaýdy jón dep sheshipti.

Qarý-jaraq dúkeninen bastap, áskerı bólimge de shabýyl jasaǵandar sol kúni Dmıtrıı Tańatarovtyń shildehanaǵa shaqyrǵanyn aıtady. Jaldamaly páterde dám aýyz tıgizip, bir saǵat boıy jıhad jaıynda ýaǵyz aıtypty.

Asqat Rahmetov:

-Tamaqtandyrǵan soń telefondaryn alyp alǵan. Keıin óshirip tastaǵan.

Qazir lańkester atysqa ne ıtermelegenin naqty aıta almaıdy. Biri ýaǵyzǵa uıyǵanyn aıtsa, biri sý ishken soń esimizden adastyq dep otyr. Muny sarapshylar da joqqa shyǵarmaıdy. Óıtkeni sodyrlardyń qan quramynan esten tandyratyn amfetın men petanıl tabylǵan. Dese de, olar haq dinniń jolynan taıǵandaryn moıyndaıdy.

Álibek Aqpanbetov:

-Namazda júrgen baýyrlarǵa aıtarym qatelespeńder. Adam óltirip, jánatqa túsý múmkin emes. 

Sodyrlar osylaı, kózderinen jastaryn sorǵalatyp, halyqtan keshirim surady. Endi ókingenimen atysta tiri qalǵan jeteýi ómir boıy bostandyq kórmeıdi. Áıtse de erkindikte qalǵan balalary úshin alańdaıdy eken. 

Baqyt Qýanyshbaev:

- Otyrmyn aldaryńyzda. Mama, keshir deımin boldy. Balalaryma qarashy.

 «Orazadaǵy oıran» dep atalatyn bul derekti fılm Aqtóbedegi jergilikti arnalar men ǵalamtordaǵy saıttar arqyly kórsetilip jatyr. Jergilikti bılik endi ony jastar arasyndaǵy lańkestikpen  kúresý quraly retinde qoldanbaqshy. Ol úshin aımaqtaǵy barlyq oqý oryndarynda kórsetiledi.